Ադրբեջանական ANS հեռուստաալիքի ղեկավարությունը ձերբակալվել է Գյուլենի մամուլի ասուլիսի մասին պատմող անոնսը հեռարձակելու համար
19-07-2016 11:51:14 | Ադրբեջան | Քաղաքական
Ձերբակալվել են ադրբեջանական ANS ընկերությունների խմբի նախագահ Վախիդ Մուստաֆաևը և ANS հեռուստաալիքի փոխնախագահ Միրշախին Աղաևը` հանրապետության Գլխավոր դատախազության ծանր հանցագործությունների վարչությունում ցուցմունք տալու նպատակով:
Լրագրողներին ձերբակալել են այս գիշեր: Այս տեղեկությունը հաստատել են հեռուստաընկերության աշխատակիցները: Ձերբակալվածների հեռախոսները չեն պատասխանում:
Մի քանի ժամ առաջ ՆԳՆ ոստիկանության Սաբայիլի վարչության և Գլխավոր դատախազության աշխատակիցնեը կնքել են ANS հեռուստաընկերության խմբագրությունը: Հեռուստաընկերության ղեկավարության հանդեպ հարուցվել է քրեական գործ «ահաբեկչության քարոզչություն» հոդվածով:
Իսկ խնդիրը հետևյալն է: Երեկ երեկոյան Գլխավոր դատախազության ներկայացմամբ Հեռուստառադիոհեռարձակման ազգային խորհուրդը դադարեցրել է ANS հեռուստաընկերության ռադիո- և հեռուստահեռարձակումը: Խորհրդի տարածած հաղորդագրության համաձայն` հեռուստաընկերության ժամանակավոր փակման պատճառը ԱՄՆ-ում գտնվող Ֆեթհուլլահ Գյուլենի հետ հարցազրույցի հեռարձակումը կանխելն է:
Հեռարձակման դադարեցման որոշումը կայացրել է Կապի ու բարձր տեխնոլոգիաների նախարարությունը:
Նշենք, որ ԱՄՆ-ում ANS-ի հատուկ թղթակից Գանիրա Ատաշևան նախօրեի առավոտյան տարածել էր Ֆեթհուլլահ Գյուլենի հետ հարցազրույցի մասին պատմող անոնս: Համաշխարհային բազմաթիվ ԶԼՄ-ներ հետ միասին լրագրողը մասնակցել էր թուրք վտարանդիի մամուլի ասուլիսին:
ՀԱՅԵՐԵՆ
Русский
English
Դաս. հայերեն
French
