Գերմանիան քաղաքացիական պաշտպանության նոր հայեցակարգ է ընդունել
24-08-2016 17:10:27 | Գերմանիա | Հասարակություն
Գերմանիայի կառավարությունը չորեքշաբթի ընդունել է քաղաքացիական պաշտպանության ծրագիր, որն ընդգրկում է պետական գործունեության
մի շարք միջոցառումներ, ինչպես նաև ճգնաժամի պայմաններում բնակչությանը սնունդով և դեղամիջոցներով ապահովելու հարցը:
Interfax.ru-ի փոխանցմամբ` քաղաքացիական պաշտպանության նոր հայեցակարգն առաջին անգամ 20 տարիների ընթացքում ներկայացվել և ընդունվել է Գերմանիայի կառավարության կողմից: Ծրագիրն իրենից ներկայացնում է 69 էջանոց մի փաստաթուղթ և բաղկացած է 10 կետերից: Այն սահմանում է բնակչության պաշտպանության համար անհրաժեշտ միջոցառումներն ահաբեկչությունների, զինված հարձակման, կիբերհարձակումների և արտակարգ իրավիճակների պարագայում:
Մասնավորապես, փաստաթուղթը պարունակում է որոշակի խորհուրդներ ուղղված Գերմանիայի բնակչությանը, օրինակ, թե ինչպես մեկ մարդու համար հինգ օրվա ընթացքում պահեստավորել 10 լիտր ջուր և սնունդ: Հայեցակարգը նաև հրահանգում է քաղաքներում կառուցել հատուկ ջրհորներ, որոնք ունակ կլինեն առնվազն երկու շաբաթվա կտրվածքով բնակչությանն ապահովել խմելու ջրով:
«Գերմանիայի տարածքում հարձակումները, որոնք կպահանջեին անհրաժեշտ միջոցառումներ, քիչ հավանական են, սակայն երկիրը պետք է բավարար չափով պատրաստված լինել հնարավոր սպառնալիքներին»,- ասված է գերմանական կառավարության կոմյունիկեյում:
ՀԱՅԵՐԵՆ
Русский
English
Դաս. հայերեն
French
