«Հորտուս Մուզիկուս» անսամբլը ելույթ կունենա Երևանում
31-08-2016 09:24:59 | Հայաստան | Մշակույթ
Հայաստան Հանրապետության անկախության 25-րդ ամյակի կապակցությամբ Երևանյան Հեռանկարներ” միջազգային երաժշտական փառատոնի շրջանակներում, հայ երաժշտասեր հանրությանը սպասվում է մեծ անակնկալ: Սեպտեմբերի 14-ին Արամ Խաչատրյանի անվան Օպերայի եւ բալետի ազգային ակադեմիական թտրոնում հայ հանդիսատեսը հնարավորություն կունենա մասնակիցը լինելու մեր օրերի ամենախարիզմատիկ երաժիշտներից մեկի` Անդրես Մուստոնենի և “Հորտուս Մուզիկուս” խմբի երաժիշտների կողմից կայանալիք գեղեցիկ համերգային միջոցառմանը:
<< Նոյյան Տապան >>-ի թղթակցի հետ զրույցում համերգի կազմակերպիչները տեղեկացրեցին , որ համերգային ծրագրում կհնչեն «Շողացող վերածնունդ», «Փայլուն Բարոկկո» ստեղծագործությունները:
Ըստ միջոցառման կազմակերպիչների, «Հորտուս մուզիկուս» երաժշտախումբը սեպտեմբերի 15-ին նաև ելույթ կունենա Բյուրական արվեստի ակադեմիայում մեկ այլ յուրահատուկ ծրագրով, որի ընթացքում հանդիսատեսը հնարավորություն կունենա ունկնդրելու հրեական երգեր ու ավանդական երաժշտություն, հատվածներ «Կարմինա Բուրանա» ձեռագրերի շարքից:
Հիշեցնենք, որ “Երևանյան Հեռանկարներ” միջազգային երաժշտական փառատոնը հիմնվել է 2000 թվականին ,հիմնադիր նախագահ և գեղարվեստական ղեկավար Ստեփան Ռոստոմյան , փառատոնի գլխավոր մենեջեր Սոնա Հովհաննիսյան:
“Երևանյան Հեռանկարներ” միջազգային երաժշտական փառատոնը հանդիսանում է Եվրոպայի առաջատար փառատոններից մեկը՝ Երևան հրավիրելով աշխարհահռչակ երաժիշտների և նվագախմբերի:
Տեղեկացնենք, որ փառատոնն անցկացվում է ՀՀ նախագահ Սերժ Սարգսյանի բարձր հովանու ներքո՝ Մշակույթի նախարարության և քաղաքապետարանի աջակցությամբ: Եւ այս տարի այն նվիրվում է ՀՀ անկախության 25 ամյակին: