Ի հիշատակ արցախյան քառօրյա պատերազմում զոհվածների՝ Արտաշատում բնակիչների ջանքերով խաչքար բացվեց (տեսանյութ)

10-09-2016 15:16:39 | Հայաստան | Հասարակություն

Արցախյան քառօրյա պատերազմում զոհված հայորդիների հիշատակն անմահացնելու համար Արտաշատ քաղաքի բակերից մեկում տեղի ունեցավ խաչքարի բացման հանդիսավոր արարողություն:

Հուշակոթողին առաջինը մոտեցան Արտաշատի Սուրբ Հովհաննես ավետարանիչ եկեղեցու հոգևորականները` հովիվ Տեր Թաթուլ Գասպարյանի գլխավորությամբ:

Վերջինս օծելով ու օրհնելով հուշարձանը` հավաքվածներին առաջարկեց միասնական աղոթք հնչեցնել առ Աստված և հանգստություն խնդրել հայրենիքի սահմանների պաշտպանության ընթացքում նահատակված հերոսների հոգիների համար:

Արտաշատի բնակիչներ` նախաձեռնության հեղինակ Քաջիկ Գրիգորյանի և հովանավոր Հովսեփ Խուդոյանի համատեղ ջանքերով իրականություն դարձած գաղափարի շնորհիվ այսուհետ արտաշատցիները հնարավորություն ունեն ոչ միայն հաճախակի հարգանքի տուրք մատուցել և ծաղիկներ խոնարհել բարեկարգված բակում տեղադրված խաչքարի մոտ, այլև զոհված հերոսների օրինակով դաստիարակել մատաղ սերնդին:

Խաչքարի հեղինակ, 16-ամյա քանդակագործ Մուշեղ Բարսեղյանը, ով ապագա զինվոր է, անկեղծանում է. «Խաչքարն ստեղծելիս լցված է եղել մեծ հպարտությամբ ու անսահման հայրենասիրությամբ, որը կրկնապատկել է Հայոց բանակում ծառայելու և հերոս տղաների արժանի հետևորդը լինելու ցանկությունը»:

«Ազատամարտիկների և զորացրված զինծառայողների իրավունքների պաշտպանություն» հասարակական կազմակերպության նախագահ, պահեստազորի փոխգնդապետ Ռազմիկ Ռուշանյանի խոսքերով` հուշարձանի վրա պատկերված խորհրդանիշները, մասնավորապես, խաչի տեսքով սուրը խորհրդանշում է հայ ժողովրդի ուժը և հավատքը:

Միջոցառման ավարտին կատարվեց մատաղի արարողություն, այն բաժանվեց ներկաներին:

Ի դեպ` խաչքարի կանգնեցման գործում իր ներդրումն է ունեցել նաև Արտաշատի քաղաքապետը, ով տրամադրել է տարածքը և բարեկարգման աշախատանքների համար անհրաժեշտ շինանյութը:

Էլիզա Զախարյան, «Նոյյան Տապան»

Տեսանյութը՝ «Նոյյան Տապան»-ի

Նոյյան տապան - Հասարակություն

Կարդացել են 2353 անգամ

https://s1.merlive.am/Noian_Tapan/embed.html?autoplay=false&play

Ի հիշատակ արցախյան քառօրյա պատերազմում զոհվածների՝ Արտաշատում բնակիչների ջանքերով խաչքար բացվեց (տեսանյութ)

Noyan Tapan TV