Ադրբեջանի եւ Թուրքիայի կողմից Ջավախքի խնդիրը ընկալվում է
որպես մի սեպ, որը կարելի է խրել Հայաստանի եւ Վրաստանի միջեւ,-
գտնում է Աշոտ Մելքոնյանը
18-02-2010 15:12:00 | Հայաստան | Քաղաքական
ԵՐԵՎԱՆ, 18 ՓԵՏՐՎԱՐԻ, ՆՈՅՅԱՆ ՏԱՊԱՆ: Վերջին տարիներին
Վրաստանի իշխանությունները խտրական քաղաքականություն են
իրականացնում վիրահայության նկատմամբ: Այս մասին
Սամցխե-Ջավախեթի-Ծալկա տարածաշրջանի հայապահպանության եւ
ջավախահայության իրավունքների պաշտպանությանը նվիրված փետրվարի
18-ի սեմինար-քննարկմանը հայտարարեց Հայաստանի ԱԺ պատգամավոր Շիրակ
Թորոսյանը: Ըստ նրա, այսօր վրացական իշխանությունները որդեգրել են
ջավախահայության քաղաքական, լեզվական, հոգեւոր-մշակութային,
սոցիալ-տնտեսական իրավունքները ոտնահարող քաղաքականություն: Այդ
քաղականությանն արդյունքում ջավախահայության մեջ գնալով տարածվում
են վախի եւ հիասթափության տրամադրություններ, ինչն իր հերթին
հանգեցնում է տարածաշրջանից արտագաղթի ծավալների մեծացմանը:
«Այս քննարկումը միտված է Վրաստանում ապրող հայերի բոլոր
խնդիրները բարձրաձայնելուն` կոչ անելով Հայաստանի
իշխանություններին, սփյուռքյան կազմակերպություններին անհապաղ
միջոցներ ձեռնարկել հայության նկատմամբ վրացական իշխանությունների
խտրական քաղաքականությունը կասեցնելու ուղղությամբ: Այս կոչն
ուղղված է նաեւ միջազգային կազմակերպություններին, որպեսզի
վերջիններս ճնշում գործադրեն վրացական իշխանությունների վրա
ազգային փոքրամասնությունների իրավունքների վերաբերյալ ստանձնած
միջազգային պարտավորությունների կատարման հարցում»,- ասաց
Շ.Թորոսյանը: Առկա խնդիրներից ԱԺ պատգամավորը առաջնահերթ համարեց
ջավախահայ ակտիվիստների նկատմամբ քաղաքական հետապնդումների անհապաղ
դադարեցումը, Վրաստանում Հայ առաքելական եկեղեցուն իրավական
կարգավիճակ տալու հարցը, ինչպես նաեւ հայկական եկեղեցիների
վերադարձման խնդրի լուծումը:
ՀՀ ԳԱԱ Պատմության ինստիտուտի տնօրեն Աշոտ Մելքոնյանը նշեց,
որ շատ կարեւոր եւ արդիական է Ջավախքը դիտարկել ոչ միայն
հայ-վրացական հարաբերություններում, այլեւ վրաց-թուրքական,
վրաց-ադրբեջանական հարաբերություններում: Ըստ նրա, այս մոտեցումը
մոռացության է մատնվել այն դեպքում, երբ Ջավախքի խնդիրը անընդհատ
շահարկվում է ադրբեջանական ու թուրքական եւ' քաղաքական
շրջանակներում, եւ' մամուլում: Ա.Մելքոնյանի կարծիքով, Ադրբեջանի
եւ Թուրքիայի կողմից Ջավախքի խնդիրը ընկալվում է որպես մի սեպ, որը
կարելի է խրել Հայաստանի եւ Վրաստանի միջեւ: «Այս խնդիրը չափազանց
կարեւոր է, եւ այստեղ պետք է ցուցաբերել չափազանց մեծ
զգուշավորություն, քանի որ Ջավախքի խնդիրը նման պարագայում
թուրքերի եւ ադրբեջանցիների կողմից օգտագործվելու դեպքում, կարող է
լուրջ բացասական ազդեցություն ունենալ հայ-վրացական
հարաբերությունների վրա»,- ասաց Ա.Մելքոնյանը:
Ջավախահայության իրավունքների պաշտպանության համակարգող
խորհրդի կողմից կազմակերպված սեմինար-քննարկմանը մասնակցում էին
տարբեր գերատեսչությունների, քաղաքական կուսակցությունների
ներկայացուցիչներ, փորձագետներ: