«Welcome to Armenia»-ի ընթացքում քննարկվեց հայաստանյան զբոսաշրջությունը՝ առկա խնդիրներից մինչև հնարավորություններ. (տեսանյութ)
28-10-2016 21:11:20 | Հայաստան | Հասարակություն
Զբոսաշրջության ոլորտում Հայաստանի ներուժը գնահատելուն, հնարավորություններն ու բացթողումները բացահայտելուն և այս ուղղությամբ պատկան մարմինների անելիքները հստակեցնելուն էր նվիրված այսօր կայացած «Welcome to Armenia» զբոսաշրջային համաժողովը:
«Հայաստանի բիզնես-գործընկերներ» կամ որ նույն է BPA ընկերության նախաձեռնությամբ կազմակերպված համաժողովին մասնակցում էին ոլորտի հետ սերտորեն առնչվողները` զբոսաշրջային ծառայություններ մատուցող ընկերությունների ներկայացուցիչներից մինչև ՀՀ Մշակույթի, Սպորտի և երիտասարդության հարցերի նախարարներ, ինչպես նաև օրենսդիր մարմնի ներկայացուցիչներ:
«Welcome to Armenia» համաժողովի մասնակիցների ուշադրության կենտրոնում էր մշակութային, սպորտային, էքստրեմալ, կրոնական տուրիզմին վերաբերող հարցերն ու առաջարկները, ինչպես նաև մինչ օրս լայն տարածում չունեցող տուր-փաթեթները:
Հայաստանյան զբոսաշրջային ուղղություններին առաջինն անդրադրձավ Մայր Աթոռ Սուրբ Էջմիածնի արխիվի և ձեռագրերի պահոցի տնօրեն Տեր Ասողիկ քահանա Կարապետյանը: Վերջինս կարևորելով կրոնական տուրիզմի զարգացումը Հայաստանում` նշեց, որ հայ առաքելական Սուրբ եկեղեցին այլ խնդիրների հետ մեկտեղ լրջորեն մտածում է նաև այս ուղղությամբ:
Տեր Ասողիկ քահանա Կարապետյանը նկատում է. երեք տարի առաջ Մայր Աթոռ Սուրբ Էջմիածինն Ամենայն հայոց կաթողիկոսի օրհնությամբ հաստատել է Սուրբ Գեղարդի ուխտի օրը, սակայն տուրիստական ընկերությունների կողմից նախանձախնդրություն չի դրսևորվել այն միջազգայնացնելու: Նրա խոսքերով` կրոնական տուրիզմի զարգացման ոլորտում ունեցած ներուժը Հայաստանը բավարար կերպով առայժմ չի կարողանում օգտագործել:
Զբոսաշրջության ոլորտն աշխուժացնելու ուղղությամբ ՀՀ Մշակույթի նախարարությունն Արմեն Ամիրյանի խոսքերով` սկսել է աշխատել IT ոլորտի ներկայացուցիչների հետ:
Ա. Ամիրյանը հորդորեց զբոսաշրջային ծառայություններ մատուցող ընկերություններին իրենց տուր-փաթեթներում ընդգրկել նաև Օպերային թատրոնում բեմադրվող հեղինակավոր օպերաները, որոնք մեծ հետաքրքրություն են վայելում արտերկրյա հյուրերի շրջանում:
Մշակույթի նախարարի համոզմամբ` վաղուց ժամանակն է, որպեսզի զբոսաշրջային տեսանկյունից մայրաքաղաքը բեռնաթափվի: Այս ուղղությամբ 2017 թվականին նախատեսվում է Գյումրիում անցկացնել դուդուկի և երգչախմբի միջազգային փառատոնները:
Շրջանների համաչափ զարգացմանն էր ուղղված նաև Սպորտի և երիտասարդության հարցերի նախարար Հրաչյա Ռոստոմյանի կողմից արված դիտարկումները: Նա, մասնավորապես, առաջարկեց Ծաղկաձորում, որպես Հայաստանի հիմնական մարզաբազա, աշխուժացնել ժամանցային կյանքը` նկատի ունենալով այնտեղ հեղինակավոր հայ երգիչների կամ երաժիշտների համերգների կազմակերպումը:
ՀՀ ԱԺ տնտեսական հանձնաժողովի փոխնախագահ Միքայել Մելքումյանի խոսքերով` Զբոսաշրջության մասին Հայաստանում գործող օրենսդրությամբ պետությունը բազմաթիվ պարտավորություններ ունի իրականացնելու, սակայն իրականության մեջ օրենքը չի գործում: Այն ավելի կենսունակ դարձնելու նպատակով նա բոլոր շահագրգիռ կողմերին հրավիրեց Ազգային ժողով` համապատասխան հարցերն ու առաջարկները հանգամանալից կերպով քննարկելու համար:
Մ. Մելքումյանի դիտարկմամբ` այսօր Ծաղկաձորը դարձել նահանջող զբոսաշրջային ուղղություն, Ջերմուկն ունի մեծ ներուժ, որը պետք է օգտագործել, իսկ Դիլիջանը և Տաթևը հավակնում են դառնալ զարգացող հայտնի շրջաններ:
Դահլիճից ևս հնչեցին մտահոգություններ ու առաջարկներ, որոնք համապատասխան մարմինների ներկայացուցիչները խոստացան քննարկել համատեղ:
ՀԱՅԵՐԵՆ
Русский
English
Դաս. հայերեն
French
