Կանադան 2017 թվականից իրականացնելու է օվկիանոսների պահպանության ծրագիր
08-11-2016 12:49:29 | Կանադա | Միջազգային
Կանադայի վարչապետ Ջասթին Տրյուդոն հայտարարել է, որ այդ երկրի կառավարությունը 1,1 մլրդ դոլար է ներդնելու Խաղաղ, Ատլանտյան և Հյուսիսային սառուցյալ օվկիանոսների պահպանության ծրագրում:
korrespondent.net-ի փոխանցմամբ` վարչապետի տարածած հայտարարության մեջ, մասնավորապես, ասվում է. «Կանադայի տնտեսությունը, նրա շրջական միջավայրը և պատմությունն անքակտելիորեն կապված են ափամերձ տարածաշրջանների հետ: Այսօր օվկիանոսների պահպանության կապակցությամբ ներկայացված ծրագիրը Կանադային վերածելու է ծովային անվտանգության ոլորտում համաշխարհային առաջնորդ, որն այդ ուղղությամբ անելու է հզոր քայլ առաջ ափամերձ շրջանների, բնիկ ազգերի և տեղական հասարակության հետ համատեղ»:
Տրյուդոն ընդգծել է, որ այդ ծրագրի իրականացման շնորհիվ` Կանադայի առափնյա շրջանները կմնան էկոլոգիապես մաքուր և անվտանգ հետագա սերունդների համար:
Հինգ տարվա ծրագրի իրականացումը սկսվելու է 2017 թվականից: