Ռեկտորի գնահատմամբ` 2016 թվականը բարեհաջող է եղել «Եվրասիա» միջազգային համալսարանի համար (տեսանյութ)
28-12-2016 16:05:50 | Հայաստան | Հասարակություն
Ամփոփելով 2016 թվականի ընթացքում կատարված աշխատանքները` «Եվրասիա» միջազգային համալսարանի ռեկտոր Սուրեն Օհանյանն անցնող տարին ընդհանուր առմամբ բարեհաջող գնահատեց:
Վերջինս «Նոյյան Տապան»-ի թղթակցի հետ զրույցում նշեց, որ 2017 թվականին սպասում է բազմաթիվ ակնկալիքներով:
1997 թվականից մասնավոր կրթական գործունեությամբ զբաղվող Ս. Օհանյանը ստեղծել է շարունակական կրթական գործունեություն իրականացնող կառույցներ` «Նյուտոնիկ» նախակրթարանը, «Օհանյան» կրթահամալիրը և «Եվրասիա» միջազգային համալսարան և հենակետային վարժարանը:
«Տարրական դպրոցում ներդրվել է «Գիտություն» դասընթացը, որն իր մեջ ներառում է բնագիտական այն բոլոր նախնական հասկացությունները, որոնք հետագայում երեխային առեղծվածային են թվում` առանց հասկանալու նրանց առաջացման պատճառները և հետևանքները, հետևաբար սկսած հենց առաջին դասարանից, նույնիսկ առանձին դեպքերում որոշ փորձեր տեղափոխվել են մանկապարտեզ, և փորձերի միջոցով իրականցվում է «Գիտություն» առարկայի դասավանդումը»,- նշեց Ս. Օհանյանը:
Անդրադառնալով «Օհանյան» կրթահամալիրին` նա տեղեկացրեց, որ դպրոցը մասնակցում է միջազգային մի շարք ծրագրերի, իսկ մի քանի տարի առաջ «Microsoft» ընկերության կողմից արժանացել է աշխարհի ընտրված 63 դպրոցների կարգավիճակին:
Ս. Օհանյանի փոխանցմամբ` շատ են ձեռքբերումները նաև «Եվրասիա» միջազգային համալսարան և հենակետային վարժարանի դեպքում:
«2015 թվականին համալսարանն անցել է ինքնավերլուծության փուլ և ինստիտուցիոնալ հավատարմագրման գործընթաց, այժմ մենք վեց ամիսը մեկ հաշվետվություններ ենք ներկայացնում. Ասեմ, որ լիարժեք և խիստ պայմաններ են առաջադրվել Որակի ապահովման ազգային կենտրոնի կողմից, մեկ ու կես տարվա ընթացքում մենք արդեն հասցրել ենք բավարարել նրանց կողմից ներկայացված պահանջները, հետևաբար որպես համալսարան` մենք մեզ շատ լավ ենք զգում ոչ միայն ենթակառուցվածքների, այլև ընդհանուր կրթական մշակույթի առումով»,- ընդգծեց նա:
Ըստ Ս. Օհանյանի` վերոնշյալ երեք կրթական հաստատությունների հաջողությունները հիմնականում պայմանավորված են ուսուցչական անձնակազմի մասնագիտական պատրաստվածությամբ և սրտացավ աշխատանքով: