ԵՐԵՎԱՆ, 24 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 24-ին
Երեւանում անցկացվեց «Հավաքական անվտանգության պայմանագրի
կազմակերպությունը որպես կովկասյան տարածաշրջանում կայունության եւ
անվտանգության գործոն» թեմայով կլոր սեղանը:
«Մեր բարդ տարածաշրջանը գլոբալ եվրասիական տարածքի ոչ միայն
աշխարհագրական, այլեւ յուրօրինակ գեոքաղաքական, տրանսպորտային,
քաղաքակրթական եւ մշակութային խաչմերուկն է: Այդ պատճառով այստեղ
տեղի ունեցող իրադարձությունների արձագանքը հզոր ռեզոնանս է
առաջացնում նրա սահմաններից հեռու»,- իր խոսքում նշեց Հայաստանի
Ազգային անվտանգության խորհրդի քարտուղար Արթուր Բաղդասարյանը: Նա
ընդգծեց, որ կովկասյան տարածաշրջանում առկա գործընթացները բազմաթիվ
սուր խնդիրներ են առաջադրում, որոնց լուծման համար պահանջվում են
տարածաշրջանի բոլոր երկրների համատեղ ջանքերը: Իսկ ջանքերի
միավորումը, ըստ Ա.Բաղդասարյանի, հնարավոր է միայն տարածաշրջանի
երկրների փոխվստահության առկայության, այստեղ բնակվող բոլոր
ժողովուրդների շահերը հաշվի առնող բաց եւ շահագրգիռ երկխոսության
դեպքում միայն: Նա նշեց. «Հայաստանի Հանրապետությունը միշտ
հետեւողականորեն հանդես է եկել երկարաժամկետ խաղաղության եւ
բարիդրացիական հարաբերությունների հաստատման, իրավահավասար
գործընկերության եւ տարածաշրջանի բոլոր երկրների հետ
համագործակցության օգտին` առանց որեւէ նախապայմանի, եւ մեր
դիրքորոշումն այս հարցում մնացել է անփոփոխ»: Ըստ նրա, Հայաստանի
եւ Թուրքիայի միջեւ դիվանագիտական հարաբերությունների հաստատումը
եւ սահմանի բացումը սկզբունքորեն նոր իրավիճակ կստեղծի
տարածաշրջանում:
Կլոր սեղանի ավարտին հրավիրված մամուլի ասուլիսում ՀԱՊԿ-ի
գլխավոր քարտուղար Նիկոլայ Բորդյուժան նշեց, որ ակնկալվում է, որ
երեւանյան կլոր սեղանին կհաջորդեն նաեւ նման միջոցառումներ
կազմակերպության անդամ այլ երկրներում: «Մենք շատ կցանկանայինք
իմանալ փորձագիտական խորհրդի կարծիքը ՀԱՊԿ-ի գործողության ներքո
գտնվող բոլոր տարածաշրջաններում ռազմաքաղաքական իրադրության մասին,
ինչպես կառուցել հավաքական անվտանգության համակարգը եւ ինչ է պետք
հաշվի առնել այն կառուցելիս»,- ասաց նա: