Հայկական կազմակերպությունը Ախալցխայում ամենաբարձրն է
գնահատվել USAID-ի «Ժողովրդավարություն եւ կառավարում» ծրագրի
կողմից
19-11-2009 15:05:00 | Հայաստան | Հասարակություն
ԱԽԱԼՑԽԱ, 19 ՆՈՅԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Ախալցխայում գործող տարբեր կազմակերպությունների ներկայացուցիչներ
օրերս հանդիպել են USAID-ի «Ժողովրդավարություն եւ կառավարում»
ծրագրի տեղական գրասենյակի ծրագրերի գծով մասնագետ Քեթի Բաքրաձեի
հետ:
«Ժողովրդավարություն եւ կառավարում» ծրագրի շրջանակում
Վրաստանի ամբողջ տարածքում նման հանդիպումներ են անցկացվում`
կազմակերպությունների վերաբերյալ տարեկան զեկույց պատրաստելու
նպատակով, որտեղ գնահատվում է վերջիններիս գործունեությունը:
Հարցումները հիմնականում վերաբերում են ֆինանսական, սոցիալական,
տնտեսական եւ իրավաբանական ոլորտներին:
Ինչպես տեղեկացնում է Akhaltskha.net կայքը, հանդիպմանը
մասնակցել են «Դեմոկրատ Մեսխերի», «Տոլեռանտ», «Հարավային դարպաս»,
«Ախալցխայի հայկական երիտասարդական կրթամշակութային կենտրոն» եւ մի
շարք այլ կազմակերպությունների ներկայացուցիչներ:
Հարցումների արդյունքում պարզ է դարձել, որ Ախալցխայում
գործող կազմակերպությունների շարքում ամենաբարենպաստ վիճակում
գտնվում է Ախալցխայի հայկական երիտասարդական կրթամշակութային
կենտրոնը, որը չի ֆինանսավորվում դոնոր կազմակերպության կողմից եւ
գրանտային ծրագրեր չի կազմում, այլ ֆինանսավորվում է բարերարների
կողմից: