Համագործակցության հուշագիր` զբոսաշրջությունը Գյումրիում զարգացնելու համար
06-03-2017 16:14:01 | Հայաստան | Տնտեսություն
Հայաստանի Հանրապետության տնտեսական զարգացման և ներդրումների Նախարարության զբոսաշրջության պետական կոմիտեի և Գյումրու Տեխնոլոգիական կենտրոնի միջև ստորագրվեց համագործակցության մասին հուշագիր:
Հուշագիրը ստորագրեցին ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահ Զարմինե Զեյթունցյանը և Գյումրու տեխնոլոգիական կենտրոն ծրագրի գլխավոր օպերատոր, Ձեռնարկությունների ինկուբատոր հիմնադրամի տնօրեն Բագրատ Ենգիբարյանը:
Հուշագրի շրջանակներում կխրախուսվի Գյումրու զարգացման հիմնախնդիրների համատեղ քննարկումների, առաջնահերթությունների սահմանման նպատակով կազմակերպվող հանդիպումների, սեմինարների, համատեղ արված աշխատանքների արդյունքների ներկայացումների, անհրաժեշտության պարագայում` մասնագիտական խորհրդատվությունների և ուսուցման իրականացումը, Շիրակի մարզի և Գյումրի քաղաքի երիտասարդների ներգրավմամբ ու մասնակցությամբ զբոսաշրջության ոլորտի հեքեթոնների համատեղ կազմակերպումը, իրականացումը, գաղափարների քննարկումը և ընտրությունը:
Կողմերը մտադիր են աջակցել մարզի և Գյումրի քաղաքի զբոսաշրջության ոլորտի խթանմանն ուղղված տարաբնույթ միջոցառումների և ֆլեշմոբերի կազմակերպմանը, Գյումրի քաղաքի զբոսաշրջության զարգացման համար թիրախային փողոցների, թաղամասերի և այլ վայրերի վերափոխման, ձևավորման գաղափարների մշակմանը:
ՀԱՅԵՐԵՆ
Русский
English
Դաս. հայերեն
French
