Մոսկվայի Նկարիչների կենտրոնական տանը բացվեց Այվազովսկու
նկարների ցուցահանդեսը
20-10-2009 19:20:00 | Ռուսաստան | Մշակույթ
ՄՈՍԿՎԱ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Նկարիչների կենտրոնական տանը բացվեց ռուսական ծովանկարչության
վարպետի գլուխգործոցների ցուցահանդեսը: Ցուցադրությունը
հանդիսականներին ծանոթացնում է մասնավոր հավաքածուներում պահվող
նկարներին: Շատ աշխատանքներ ցուցադրվում են առաջին անգամ, ինչը
թույլ է տալիս արվեստասերներին նոր բացահայտումներ անել, պատմում է
«Նովոստի կուլտուրին» («Մշակութային նորություններ»): Երբ նայում
ես Այվազովսկու նկարներին, լսում ես ծովի աղմուկը եւ զգում ծովային
տարերքի ուժը: Այդպես կարելի է ասել գործնականում բոլոր նկարների
մասին, եւ դա միանգամայն բացատրում է մեծ գեղանկարչի
ստեղծագործությունների վիթխարի ժողովրդականությունը:
Հայ վաճառականների զավակ Հովհաննես Այվազյանը, որ ռուսական
արվեստի պատմության մեջ մտել է Իվան Այվազովսկի անունով, իր կյանքի
ընթացքում նկարել է մոտ վեց հազար կտավ: Եթե այդ վեց հազարը
բաժանենք իր ապրած տարիների թվին` 83, որից նախապես հանելով
մոտավորապես տասը, չէ որ նա շատ վաղ է սկսել նկարել, կստացվի, որ
Այվազովսկին ամեն չորս օրը մեկ միջինը մի նկար է նկարել: Զարմանալի
աշխատասիրություն:
Եղել է իր ժամանակի ամենաշատ ճանապարհորդող նկարիչը: Թվում է,
նա անցել է բոլոր ծովերն ու օվկիանոսները, չի եղել միայն
Անտարկտիդայում: Խիտ այտամորուքով, ինչպես իսկական ծովագայլի մոտ,
Այվազովսկին շատ նման է առագաստանավի կապիտանի: Կայսերական
նավատորմի հրամանատարությունը նույնիսկ հատուկ արտոնություն էր
շնորհել Այվազովսկուն:
«Նա զինվորական չէր, բայց ծովի հանդեպ կիրքը նրան դարձրեց
Գլխավոր ծովային շտաբի նկարիչ համազգեստ կրելու իրավունքով, սակայն
առանց ռոճիկ ստանալու իրավունքի»,- ասում է Տրետյակովյան պետական
պատկերասրահի աշխատակից Գալինա Չուրակը:
Այվազովսկին պարզապես չէր սիրում ծովը: Նա խելագարվում էր
նրա համար: Մի անգամ նույնիսկ ծովակալ Նախիմովին համոզել է վերցնել
իրեն ռազմական արշավի, որի ժամանակ Այվազովսկին վկա է դառնում
ծովային դեսանտի իջեցման: Այդպես է հայտնվել «Դեսանտի իջեցում
Սուբաշի տանը»: Սակայն Այվազովսկու ծովանկարների մեծ մասը ի վերջո
իր երեւակայության արդյունք է, եւ ինչպիսի: