2010 թ. առաջին եռամսյակի համար Հայաստանը Հազարամյակի
մարտահրավեր կորպորացիային է ներկայացրել մոտ 1մլն 772 հազար
դոլարի հայտ
18-12-2009 21:30:00 | Հայաստան | Տնտեսություն
ԵՐԵՎԱՆ, 18 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ:
Դեկտեմբերի 18-ին տեղի է ունեցել «Հազարամյակի մարտահրավեր»
հիմնադրամ-Հայաստան» ՊՈԱԿ-ի կառավարման խորհրդի հերթական նիստը,
որը վարել է խորհրդի նախագահ, վարչապետ Տիգրան Սարգսյանը:
Ինչպես հայտնում են ՀՀ կառավարությունից, խորհուրդը հաստատել
է նաեւ ՀՄՀ-Հայաստանի 14-րդ հատկացման հայտը, համաձայն որի 2010 թ.
առաջին եռամսյակում Հազարամյակի մարտահրավեր կորպորացիային է
ներկայացվել 1մլն 771հազար 871 ԱՄՆ դոլարի հայտ: Նշված հայտի
շրջանակներում նախատեսվում է առկա պայմանագրերի ներքո շարունակել
շինարարական աշխատանքները, այն է` 17 պոմպակայանների վերականգնում,
5 ինքնահոս եւ 6 մայր ջրանցքների վերանորոգում, ինչպես նաեւ սկսել
աշխատանքները Արարատի, Արմավիրի եւ Վայոց Ձորի որոշ համայնքներում
ներքին ոռոգման ցանցի եւ Արարատյան հարթավայրի դրենաժային
համակարգի վերականգնման ուղղությամբ:
Հատկացման հայտի ամբողջական փաթեթը ներառում է ՀՄՀ-Հայաստան
ծրագրի եռամսյակային ֆինանսական հաշվետվությունը, հատկացման
նախապայմանների հաշվետվությունը, աշխատանքային պլանը, ամփոփ
եռամսյակային հաշվետվությունը եւ ցուցանիշների վերահսկման
աղյուսակը, ինչպես նաեւ գնումների կատարման հաշվետվությունն ու
գնումների պլանը: