«Հայաստանի մանուկներ» հիմնադրամը եւ «HSBC Բանկ Հայաստան»-ը
ստորագրեցին պայմանագիր բնապահպանական եւ ձեռներեցության զարգացման
ծրագրի շուրջ
04-12-2009 19:45:00 | Հայաստան | Հասարակություն
ԵՐԵՎԱՆ, 4 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 4-ին Երեւանի
«Գոլդեն Թուլիփ» հյուրանոցում կայացավ «Հայաստանի մանուկներ»
հիմնադրամի եւ «HSBC Բանկ Հայաստան» ՓԲԸ-ի կողմից «Շրջակա
միջավայրի պահպանություն եւ կանանց ձեռներեցության զարգացում
գյուղական վայրերում» ծրագրի պայմանագրի ստորագրագրման
արարողությունը: Հիմնադրամի կողմից այն ստորագրեց հիմնադիր եւ
խորհրդի ատենապետ Կարօ Արմենը, բանկի կողմից` գլխավոր գործադիր
տնօրեն Թիմ Սլեյթերը:
Ծրագրի բյուջեն 36 հազար ԱՄՆ դոլար է, որից 25 հազարը, որպես
դրամաշնորհ, հատկացնում է բանկը, իսկ 11 հազարը` հիմնադրամը:
Նպատակն է կազմակերպել բնապահպանական տեսանկյունից անվտանգ,
վերաօգտագործվող կտորե տոպրակների արտադրությունն ու լայն
սպառումը, որոնք կփոխարինեն ներկայում օգտագործվող թղթե եւ
պոլիէթիլենային տոպրակներին: Ըստ ծրագրի պատասխանատուների, ծրագիրը
շարունակական է եւ յուրահատուկ, քանի որ լուծում է արդի գյուղական
Հայաստանին բնորոշ մի շարք խնդիրներ:
Ինչպես նշեց Կ.Արմենը, բարեգործական եւ ֆինանսական
կազմակերպությունների այս համագործակցությունը հրաշալի օրինակ է`
ուղղված մաքուր եւ անվտանգ շրջակա միջավայրի հանդեպ հոգատարությանը
եւ գյուղական համայնքների կանանց շրջանում ձեռներեցության
խթանմանը: Ծրագրի գործընկերն է նաեւ «Սթար» սուպերմարկետների
ցանցը, որն, ինչպես եւ «HSBC Բանկ Հայաստան» ՓԲԸ-ն, այս ծրագրին
մասնակցում է առանց որեւէ շահ հետապնդելու:
Թ. Սլեյթերը հայտնեց, որ թեեւ բանկը ավանդաբար բարեգործական
ծրագրեր է իրականացնում ի նպաստ հասարակության խոցելի խմբերի
երեխաների կրթության, սակայն համաձայնել է հիմնադրամի հետ
համագործակցել այս ծրագրի շրջանակներում, ինչը կնպաստի «ոչ միայն
մաքուր շրջակա, այլեւ` կայուն գործարար միջավայրի ստեղծմանը»:
Ըստ «Սթար» ցանցի տնօրեն Վահան Քերոբյանի, իրենք արդեն իսկ
պատրաստակամություն են հայտնել գնել տոպրակների առաջին խմբաքանակը`
հազար հատ, իրենց առեւտրային ցանցում ներդնելու համար: Նախատեսվում
է ստեղծել բոնուսների մի համակարգ, որով գնորդներին կխրախուսեն ապահովել
տոպրակների բազմակի օգտագործումը: