ՄԶԳ-ն կարեւորում է Հայաստանի դեղարտադրության ոլորտին
աջակցությունը
01-12-2009 15:46:00 | Հայաստան | Տնտեսություն
ԵՐԵՎԱՆ, 1 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ԱՄՆ Միջազգային
զարգացման գործակալության ֆինանսավորմամբ իրականացվող «Մրցունակ
մասնավոր հատված Հայաստանում» (CAPS) ծրագրի նախաձեռնությամբ
դեկտեմբերի 1-ին Երեւանում անցկացվեց Հայաստանի դեղագործության
մրցունակության երկրորդ համաժողովը: Այն կազմակերպվել էր ՀՀ
Առողջապահության եւ Էկոնոմիկայի նախարարությունների, «Դեղերի եւ
բժշկական տեխնոլոգիաների փորձագիտական կենտրոն»-ի, Հայաստանի դեղ
արտադրողների եւ ներմուծողների միության, Ազգային մրցունակության
հիմնադրամի եւ Զարգացման հայկական գործակալության
համագործակցությամբ:
ԻՆչպես համաժողովի բացմանը նշեց ՀՀ Ազգային Ժողովի
Առողջապահության հարցերի մշտական հանձնաժողովի նախագահ Արա
Բաբլոյանը, համաժողովի նպատակն է քննարկել ոլորտի ներկա իրավիճակն
ու զարգացման հեռանկարները: Ըստ նրա, 1990-ականներից սկսած ոլորտի
զարգացման ուղղությամբ բավականին լուրջ ճանապարհ են անցել, եւ մեծ
դժվարություններով հնարավոր է եղել մինիմալ չափով շուկան ապահովել
տեղական արտադրության դեղամիջոցներով: Սակայն, Ա.Բաբլոյանի
խոսքերով, պետությունն այսօր իր առջեւ պետք է խնդիր դնի
բնակչությանն ապահովել անվտանգ, որակյալ եւ մատչելի դեղերով,
ինչպես նաեւ ստեղծի պայմաններ, որպեսզի տեղական արտադրության
դեղերը լինեն մրցունակ:
ԱՄՆ ՄԶԳ-ի ՏՆտեսական աճի գրասենյակի տնօրեն Դեյվիդ Հալը նշեց,
որ Հայաստանի դեղագործության ոլորտը 2004-2007թթ.-ին ունեցել է
51%-ի աճ: ՄԶԳ-ն կարեւորում է Հայաստանի դեղարտադրության ոլորտին
աջակցությունը, քանի որ տեղում արտադրվող դեղերը էականորեն
նպաստում են, որպեսզի հիմնական դեղամիջոցները երկրի բնակչության
համար լինեն մատչելի եւ հասանելի: Բացի դրանից, ըստ Դ.Հալի, CAPS-ի
շրջանակներում աջակցություն է ցուցաբերվում ոլորտը միջազգային
ստանդարտներին համապատասխանեցնելու, միջազգային ստանդարտներին
համահունչ օրենսդրական դաշտի ձեւավորման գործում: «Հայկական դեղերի
համապատասխանությունը միջազգային ստանդարտներին կարեւոր խնդիր է,
քանի որ դրանով կնպաստենք ոլորտի մրցունակությանը, կընդլայնենք
արտահանման աշխարհագրությունն ու ծավալները»,- ընդգծեց Դ.Հալը: