ԵՐԵՎԱՆ, 25 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Մակեդոնիայում նոյեմբերի 19-ին տեղի ունեցած Հարավային եւ Արեւելյան Եվրոպայի ՏՀՏ ֆորումում կազմակերպության կառավարման խորհրդի անդամ դարձել Հայաստանի Ինֆորմացիոն տեխնոլոգիաների ձեռնարկությունների միությունը (ԻՏՁՄ): Ըստ ԻՏՁՄ մամուլի ծառայության, մեկ ամիս առաջ Վրաստանում` երկրորդ ամենամյա Ինֆորմացիոն Տեխնոլոգիաների Տարածաշրջանային Միջոցառման ընթացքում, կայացել էր հանդիպում ԻՏՁՄ ներկայացուցիչների եւ «Հարավային եւ Արեւելյան Եվրոպայի ՏՀՏ ֆորում» կառույցի ղեկավարների միջեւ, որի արդյունքում, գնահատելով ԻՏՁՄ-ի կարողությունները, ԻՏՁՄ-ն հրավիրվել էր դառնալ այս տարածաշրջանային կառույցի կառավարման խորհրդի անդամ: Հարավային եւ Արեւելյան Եվրոպայի ՏՀՏ ֆորումում (ՀԱԵ ՏՀՏ Ֆորում), որի նպատակն էր հաստատել մշտական երկխոսություն ՏՀՏ ոլորտի լայն շրջանակներում, քննարկվել են տարածաշրջանային համագործակցության մի շարք նախաձեռնություններ: Հանդիպման ընթացքում որոշվել է մեծացնել Հարավային եւ Արեւելյան Եվրոպայի ՏՀՏ ֆորումի անդամ կազմակերպությունների դերը, մշակել եւ իրականացնել տարածաշրջանային համագործակցության ծրագրեր: Մինչեւ 2010թ.-ի առաջին եռամսյակը նախատեսվում է տարածաշրջանային ծրագրերի առաջին տարբերակը ներկայացնել ՀԱԵ ՏՀՏ ֆորումի կառավարման խորհրդի եւ դոնորների քննարկմանը:

---