Յարոսլավլում կայացել է տնտեսական համագործակցության հարցերով
հայ-ռուսական միջկառավարական հանձնաժողովի 11-րդ լիագումար նիստը
25-09-2009 21:00:00 | Ռուսաստան | Տնտեսություն
ՅԱՐՈՍԼԱՎԼ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի վարչապետ
Տիգրան Սարգսյանի գլխավորած պատվիրակությունն աշխատանքային այց է
կատարել Ռուսաստանի Դաշնության Յարոսլավլ քաղաք, որտեղ կայացել է
Հայաստանի եւ Ռուսաստանի միջեւ տնտեսական համագործակցության
հարցերով հայ-ռուսական միջկառավարական հանձնաժողովի 11-րդ
լիագումար նիստը:
Մինչ նիստի սկիզբը տեղի է ունեցել հանձնաժողովի
համանախագահներ` Տ.Սարգսյանի եւ ՌԴ տրանսպորտի նախարար Իգոր
Լեւիտինի, առանձնազրույցը: Այնուհետեւ համանախագահները մասնակցել
են Հայ-ռուսական միջկառավարական հանձնաժողովի նիստի բացմանը:
Նիստը բացել է Ի.Լեւիտինը, ով հատկանշական է համարել այն, որ
նիստը տեղի է ունենում Յարոսլավլում. օրեր առաջ նույն քաղաքում
կայացել է միջազգային ֆորում, որտեղ քննարկվել են համաշխարհային
ֆինանսատնտեսական ճգնաժամի հաղթահարմանն ու նոր միջազգային
տնտեսական հարաբերություններին վերաբերող հարցեր:
Իր խոսքում Տ.Սարգսյանն անդրադարձել է երկկողմ տնտեսական
համագործակցությանը: «Հայաստանի տնտեսության մեջ տեղի ունեցած
գործընթացները նման են Ռուսաստանի Դաշնությունում տեղի
ունեցողներին: Դա պատահական չէ: Մեր տնտեսական համակարգերը
փոխպայմանավորված ու ինտեգրված են: Հայաստանի Հանրապետությունում
ռուսական կապիտալով 1000-ից ավելի ընկերություն է աշխատում:
Էներգետիկ համակարգերն ու տրանսպորտային հաղորդակցությունն
ինտեգրված են ռուսաստանյան տնտեսության հետ»,- ասել է ՀՀ
վարչապետը: Նա նշել է, որ առաջին կիսամյակում ճգնաժամը բավական
ուժեղ է հարվածել տնտեսությանը, սակայն այսօր, զգուշավոր
լավատեսությամբ, կարելի է նկատել տնտեսության աճի միտումներ: Դա
նշանակում է, որ ՀՀ կառավարության հակաճգնաժամային ծրագիրն
արդյունքեր է տալիս:
Անցնելով օրակարգի հարցերին, նիստի մասնակիցները քննարկել եւ
որոշումներ են ընդունել ՀՀ-ի եւ ՌԴ-ի միջեւ տնտեսական
համագործակցության հարցերով հայ-ռուսական միջկառավարական
հանձնաժողովի 2008թ.-ի հոկտեմբերի 20-ին կայացած տասներորդ նիստի
արձանագրության կատարման ընթացքի, երկկողմ առեւտրատնտեսական
հարաբերությունների, իրավապայմանագրային հիմքի ներկա վիճակի ու
զարգացման հեռանկարների, ՀՀ-ի կողմից պետական պարտքի դիմաց
Ռուսաստանի Դաշնությանը փոխանցված ձեռնարկությունների աշխատանքի,
վառելիքաէներգետիկ համակարգի, տրանսպորտի, մշակութային եւ կրթական
ոլորտներում համագործակցության մասին: Նիստի մասնակիցները դրական
են գնահատել էներգետիկայի, տրանսպորտի, մշակույթի, կրթության եւ
այլ բնագավառներում համագործակցության զարգացման ուղղությամբ
կատարված աշխատանքները:
Ըստ ՀՀ կառավարության Տեղեկատվության եւ հասարակայնության հետ
կապերի վարչության հաղորդագրության, նիստի ավարտին Տ.Սարգսյանը եւ
Ի.Լեւիտինը ստորագրել են Հայ-ռուսական միջկառավարական հանձնաժողովի
11-րդ նիստի Արձանագրությունը, որից հետո տեղի է ունեցել
նրանց մամուլի ասուլիսը:
Հանձնաժողովի 12-րդ նիստի անցկացման վայրն ու ժամկետները
կհստակեցվեն դիվանագիտական խողովակներով: