Եթե ՀՀԿ-ականները վարչապետի պաշտոնում ընտրեն իրենց թեկնածուին, ապա ստեղծված ճգնաժամը չի լուծվի. Նիկոլ Փաշինյան (ՏԵՍԱՆՅՈՒԹ)
27-04-2018 15:04:00 | Հայաստան | Հասարակություն
Եթե Հանրապետական կուսակցության ներկայացուցիչներն իրենց թեկնածուին ընտրեն մայիսի 1-ին վարչապետի պաշտոնում, ապա երկրում ստեղծված ճգնաժամը չի լուծվի:
Այս մասին լրագրողների հետ այսօր կայացած հանդիպման ժամանակ նշել է ԱԺ «Ելք» խմբակցության ղեկավար, «Իմ քայլը» քաղաքացիական շարժման նախաձեռնող Նիկոլ Փաշինյանը:
Ըստ նրա, մայիսի 1-ին վերոնշյալ սցենարի դեպքում, իրենք վերսկսելու են իրենց խաղաղ անհնազանդության ակցիաները և փորձելու են Կարեն Կարապետյանին բացատրել, որ վերջինս չի տիրապետում երկրում ստեղծված քաղաքական իրավիճակին:
Պատասխանելով լրագրողի այն հարցին, թե այնուամենայնիվ, ինչ ելք է կանխատեսում մայիսի 1-ին, Նիկոլ Փաշինյանը, մասնավորապես, պատասխանեց.
«Մայիսի 1-ին կանխատեսում եմ հայուր հազարավոր քաղաքացիների դուրս գալը Երևանի փողոցներում, և այս պահից կոչ ենք անում ՀՀ բոլոր քաղաքացիներին մայիսի 1-ին առավոտյան ժամը 8:00-ին լինել Երևանում և հեղեղել Երևանի փողոցներն ու հրապարակները, այդ թվում Ազգային ժողովի հարակից փողոցները»:
Նշենք, որ երեկ Հանրապետության հրապարակում կայացած հանրահավաքի ժամանակ Նիկոլ Փաշինյանն իր ելույթի ընթացքում վարչապետի պաշտոնակատար, ՀՀԿ փոխնախագահ Կարեն Կարապետյանին հրավիրեց «Մարիոթ» հյուրանոց՝ սկսելու բանակցային գործընթացի երկրորդ փուլը:
Վերջինս հրաժարվել է այդ հանդիպումից՝ այն համարելով «անհեռանկարային»: