Վարչապետ Նիկոլ Փաշինյանը ոչ մի տեղ չի փախչի. Նա ստիպված բանակցելու է՝ ներկայացնելով Հայաստանի կազմում գտնվող Արցախը
09-06-2018 16:11:16 | Հայաստան | Հասարակություն
ՀՀ վարչապետ Նիկոլ Փաշինյանը ոչ մի տեղ չի փախչի. Նա ստիպված բանակցելու է՝ ներկայացնելով Հայաստանի կազմում գտնվող Արցախը:
Այս մասին հունիսի 9-ին լրագրողների հետ հանդիպման ժամանակ նշեց քաղաքագետ Արմեն Աղայանը՝ անդրադառնալով Արցախը բանակցային կողմ դարձնելու Ն. Փաշինյանի հայտարարություններին:
Ըստ նրա՝ այդ առումով մի փոքր անպատրաստվածություն կա, որը ժամանակի ընթացքում կամ կսրբագրվի, կամ կարժանանա քննադատությունների:
«Ընդհանրապես Արցախի իշխանությունների առանձին լինելը մի մեծ միֆ է եղել, Արցախի առանձին պետություն լինելը հեքիաթ է եղել, և այսօր էլ դա հեքիաթ է: Նիկոլ Փաշինյանի այդ դիրքորոշումն ուղղակիորեն Լևոն Տեր Պետրոսյանի ահավոր սխալ, ապազգային դիրքորոշման շարունակությունն է»,- ընդգծեց քաղաքագետը՝ հավելելով, որ Արցախը Հայաստանի մաս է բոլոր առումներով և շատ բնական է, որ Հայաստանը պետք է բանակցի:
Ա. Աղայանի խոսքերով՝ Արցախի քաղաքացիներն իրավունք ունեն, նույնիսկ պարտավոր են ընտրել այն ղեկավարներին, որոնք իրենց ճակատագիրն են ներկայացնելու միջազգային հարթակներում:
Անդրադառնալով Արցախում տեղի ունեցած բողոքի ակցիաներին և ներքաղաքական վիճակին՝ բանախոսն ընդգծեց, որ Արցախում ևս փոփոխություններ կատարելու ընդհանուր ձգտում կա, պարզապես խնդիրը ժամանակի, ձևի ու հանգամանքների ընտրության մեջ է:
Ա. Աղայանը հիշեցրեց, որ ներկայումս Արցախում տեխնոկրատական իշխանություն է ձևավորվել, իսկ խորհրդարանի առումով անորոշությունը շարունակվում է, քանի որ կուսակցությունները չեն կողմնորոշվում գնալ փոփոխությունների, թե ոչ: