ԵՐԵՎԱՆ, 5 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Հանրապետության Անկախության 19-րդ տարեդարձին նվիրված միջոցառումներ են կազմակերպվել արտերկրում, որոնց մասին «ՆՏ»-ին տեղեկատվություն է տրամադրել ՀՀ ԱԳՆ-ի Մամուլի եւ տեղեկատվության վարչությունը: Բուխարեստ. Հոկտեմբերի 1-ին Ռումինիայի Գալաց քաղաքի Բնական գիտությունների թանգարանում բացվել է գրաֆիկայի ցուցահանդես` նվիրված Հայաստանի Ազգային տոնին: Բացմանը ներկա էին Հայաստանի դեսպան Համլետ Գասպարյանը, Գալացի քաղաքապետ Դումիտրիու Նիկոլաեն (Dumitru Nicolae), Գալացի Բնական գիտությունների թանգարանի գլխավոր տնօրեն տիկին Կամելիա Բուռլուկը (Camelia Burluc), Ռոմանահայոց միության ղեկավարներ, տեղի հասարակության ներկայացուցիչներ: Ցուցահանդեսում ներկայացված են դիմանկարի եւ սատիրայի անզուգական վարպետ Չիկ Դամադյանի (Cik Damadian, 1919-1985), հայտնի կարիկատուրիստ, ռեժիսոր եւ սցենարիստ Մաթի Ասլանի (Matty Aslan, (1924-1995), ինչպես նաեւ ռումինական ժամանակակից գրաֆիկայի վարպետներ Պավել Բոտեզատուի (Pavel Botezatu) եւ Միհայ Բոակայի (Mihai Boaca) գործերը: «Ռումինական մշակույթի այս նշանավոր անունները հարազատ են նաեւ մեզ` հայերիս: Մենք հպարտ ենք նրանցով եւ նրանց միջոցով է նաեւ կոփվում հայ-ռումինական բարեկամությունը»,- ցուցահանդեսից հետո լրագրողների հետ հանդիպմանը հայտարարել է Հ.Գասպարյանը: Ցուցահանդեսի առիթով հրատարակված չորս գծանակարիչների համատեղ ալբոմը, ինչպես նաեւ նկարիչներ Պավել Բոտեզատուին եւ Միհայ Բոակային, ովքեր նույն առիթով ժամանել էին Գալաց, ներկայացրել է արդի ռումինական արձակի ծանոթ անուններից Պետրոս Խորասանջյանը (Bedros Horasangian): Ցուցահանդեսից հետո կայացել է հանդիպում դեսպան Համլետ Գասպարյանի եւ Գալացի քաղաքապետ Դումիտրիու Նիկոլաեի միջեւ: Հանդիպմանը մասնակցել են նաեւ Գալացի Բնական գիտությունների թանգարանի գլխավոր տնօրեն տիկին Կամելիա Բուռլուկը եւ Ռոմանահայոց միության ներկայացուցիչները: Քննարկվել են Գալացի հայ հոգեւոր եւ կրթական հաստատությունների պահպանման, Գալացի հայերի հարուստ պատմությանը նոր սերնդին տեղյակ պահելու, դրանք շրջանի տուրիստական երթուղիների մեջ ներառելու, ինչպես նաեւ այս ուղղությամբ Հայաստանի դեսպանության հետ համագործակցելու հարցերը: Դանուբի վրա գտնվող մոտ 300 հազ. բնակիչ ունեցող Գալաց քաղաքում (Galati) հայերը հաստատվել են դեռեւս 15-րդ դարում: Հարուստ եւ ազդեցիկ հայ համայնքը ժամանակին ունեցել է եկեղեցի, դպրոց, տպարան, թատրոն, առեւտրական տներ եւ գործարաններ, գործել են մշակութային միություններ ու թատերախմբեր, հրատարակվել Ռումինիայի առաջին հայկական պարբերականները: 2002թ. մարդահամարի համաձայն Գալացում ապրում են 571 հայեր: Պահպանված են վերջերս վերանորոգված Սուրբ Աստվածածին եկեղեցին, հայկական դպրոցի շենքը, հայկական գերեզմանատունը: Գալացում գործում է Ռոմանահայոց միության տեղական մասնաճյուղը: Ժնեւ. Հայաստանի Հանրապետության Անկախության 19-րդ տարեդարձի կապակցությամբ սեպտեմբերի 30-ին Ժնեւի Հայկական կենտրոնում տեղի է ունեցել ընդունելություն: Ընդունելությանը ներկա են եղել Հայաստանի Հանրապետության Ազգային Ժողովի նախագահ Հովիկ Աբրահամյանը եւ նրա գլխավորած պատվիրակությունը, Շվեյցարիայում Հայաստանի դեսպան Շառլ Ազնավուրը, Ժնեւի տեղական իշխանության ներկայացուցիչներ, հայկական համայնքի ներկայացուցիչներ: Ընդունելության ընթացքում Հայաստանի Անկախության օրվա կապակցությամբ ուղերձով հանդես են եկել ՀՀ ԱԺ նախագահը, Շվեյցարիայում Հայաստանի դեսպանը, Ժնեւի հայ առաքելական եկեղեցու հոգեւոր առաջնորդ Աբել Մանուկյանը, շվեյցարահայերի միության նախագահ Զարեհ Քուրքջյանը: Ընդունելությունը ուղեկցվել է համերգային ծրագրով: Վաշինգտոն. Սեպտեմբերի 30-ին Վաշինգտոնում Հայաստանի դեսպանությունում տեղի է ունեցել ընդունելություն` նվիրված Հայաստանի Հանրապետության անկախության տոնի 19-րդ տարելիցին: Հյուրերի թվում էին մի քանի տասնյակ դեսպաններ, բազմաթիվ բարձրաստիճան դիվանագետներ, ԱՄՆ Պետդերտամենտի եւ Սպիտակ տան բարձրաստիճան պաշտոնյաներ, ներկայացուցիչներ ԱՄՆ Կառավարության տարբեր գերատեսչություններից` Պաշտպանության, Էներգետիկայի, Գանձապետական, Առեւտրի, Գյուղատնտեսության քարտուղարություններից, ԱՄՆ Միջազգային զարգացման գործակալությունից, ամերիկյան քաղաքական-հետազոտական կենտրոններից եւ լրատվամիջոցներից: Որպես պատվավոր հյուրեր` ներկա էին նաեւ ԼՂՀ Ազգային ժողովի նախագահ Աշոտ Ղուլյանն ու ԼՂՀ Ազգային Ժողովի հանձնաժողովի փոխնախագահ Սերգել Ղազարյանը: Դեսպանության հյուրն էր նաեւ Վաշինգտոնում այցելությամբ գտնվող արգենտինահայ հայտնի գործարար Էդուարդո Էռնեկյանը: Հյուրերի թվում էին նաեւ հայոց եկեղեցու թեմերի, ամերիկահայ քաղաքական կազմակերպությունների ղեկավարները:

---