Հայաստանի հետ վիզային ռեժիմի դյուրացման պայմանավորվածությունը չի փոխվի. Պյոտր Սվիտալսկի
16-07-2018 11:59:41 | Հայաստան | Հասարակություն
Հայաստանի հետ վիզային ռեժիմի դյուրացման պայմանավորվածությունը չի փոխվի:
Այս մասին հուլիսի 16-ին լրագրողների հետ հանդիպման ժամանակ նշեց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Ըստ նրա՝ ներկայումս քննարկում է մեկնարկել շենգենյան վիզաների սահմանային կոդեքսի վերանայման և լրամշակման տեսանկյունից, և եվրոպական դեսպանները հաստատել են բանակցությունների մանդատը:
Պ. Սվիտալսկու փոխանցմամբ՝ բանակցությունները շարունակական են, ինչը նշանակում է, որ շենգենյան վիզաների կոդեքսի հետ կապված դեռևս կայացված որոշում չկա:
«Կա առաջարկ, որը քննարկվում է, և այն պետք է ներդաշնակեցվի Եվրամիության հանձնաժողովի դիրքորոշման հետ: Հանձնաժողովը քննարկում է առաջարկը, դիրքորոշում արտահայտելու համար ունի վեց ամիս»,- ասաց Պ. Սվիտալսկին՝ հավելելով, որ դեռևս հեռու են եզրահանգման փուլից:
Նրա կարծիքով՝ կա ուժեղ միգրացիոն ճնշում, հետևաբար յուրաքանչյուր ոք, այդ թվում նաև Հայաստանում խորապես հասկանում է, որ եվրոպացիները պետք է փորձեն տարբերակներ գտնել իրենց երկրի սահմանները պաշտպանելու համար:
Դեսպանի խոսքերով՝ Հայաստանն օգտվում է վիզայի դյուրացման ռեժիմից, իսկ նվազեցման կարգով նախատեսված վճարները կիրառելի չեն այլ երկրների նկատմամբ, որոնք օգտվում են վիզայի դյուրացման ռեժիմից:
ՀԱՅԵՐԵՆ
Русский
English
Դաս. հայերեն
French
