Հայ-ռուսական դաշնակցական հարաբերություններ չի նշանակում, որ ռուսները պետք է նստեն մեր գլխին. քաղաքագետ (ՏԵՍԱՆՅՈՒԹԵՐ)

27-07-2018 15:54:35 | Հայաստան | Հասարակություն

Ռուսների հետ թշնամությունը շատ վտանգավոր է, բայց ավելի վտանգավոր է Ռուսաստանի հետ բարեկամությունը. Զգոնությունը չպետք է կորցնել:

Նման կարծիք հուլիսի 27-ին լրագրողների հետ հանդիպման ժամանակ հայտնեց քաղաքագետ Ռուբեն Մեհրաբյանը՝ անդրադառնալով հայ-ռուսական հարաբերություններին և այս օրերին Սանկտ Պետրեբուրգ վարչապետ Նիկոլ Փաշինյանի կատարած այցին:

Ըստ նրա՝ վարչապետի այցը Ռուսաստան կապված է Հայաստանի խորհրդարանական կառավարման համակարգով, որի արդյունքում կան դեռևս թերի կարգավորումներ:

Ռ. Մեհրաբյանի խոսքերով՝ ԵԱՏՄ-ում Հայաստանն ունի բազմաթիվ չլուծված խրոնիկական խնդիրներ, որոնց լուծումը Ն. Փաշինյանը փորձ կանի առաջ տանել:

«Թե ինչ կստացվի, ես չգիտեմ: Նայելով տրամադրություններից՝ քայլերը տրվելու են շատ դժվար, գոնե այս վերջին հարցազրույցից, այս ինտոնացիաներից, որը զզվանքից բացի այլ բան չի առաջացնում, ռուս լրագրող Վենեդիկտովի հետ, չհաջողված էր: Գուցե պետք էր զրուցել հայերերն թարգմանչի օգնությամբ»,- ընդգծեց քաղաքագետը՝ հավելելով, որ այնտեղ հնչած վարչապետի որոշ մտքեր մնում են խնդրահարույց:

Բանախոսի համոզմամբ՝ հայկական կողմը բացահայտ տեքստով պետք է մեկընդմիշտ ռուսներին բացատրի, որ Հայաստան-ՆԱՏՕ հարաբերությունները բխում են Հայաստանի շահերից:

Անդրադառնալով ռուս սահմանապահների ներկայությանը հայ-իրանական սահմանին և օդանավակայանում՝ Ռ. Մեհրաբյանը շեշտեց, որ երկու դեպքում էլ ռուսների ներկայությունն անհիմն է.

«Հայ-իրանական սահմանը բաց սահման է, այդտեղ իրականացվում է ուղղակի սահմանային ռեժիմի ապահովում, և չեն անում մի բան, որ հայ սահմանապահները չեն կարող անել. Երկրորդը՝ ռուս սահմանապահներն ի՞նչ գործ ունեն մեր օդանավակայանում, այնտեղ մեր ի՞նչն են պահպանում, ի՞նչն է բխում մեր շահերից. Օդանավակայանում մեզ պաշտպանել պետք չի. Այո՛ դրա մասին էլ պետք է ասվի, սակայն չասվեց»,- նկատեց քաղաքագետը՝ շեշտելով. «Հայ-ռուսական դաշնակցական հարաբերություններ չի նշանակում, որ ռուսները պետք է նստեն մեր գլխին»:

Փանիկի միջադեպի հետ կապված «Նոյյան Տապան»-ի՝ «Որքանո՞վ էր կատարվածն անփութության հետևանք» հարցին ի պատասխան՝ Ռ. Մեհրաբյանը նշեց, որ այդ դեպքը լավ բեմադրված թյուրիմացություն էր՝ ուղղված նրան, որպեսզի Հայաստանի նոր իշխանությանն ատամով փորձեն՝ պինդ է, թե՞ չէ: