Ռուսաստանաբնակ հայ բիզնեսմեններին ներքին կարգով ասված է, որ ՀՀ գումար չուղարկեն (ՏԵՍԱՆՅՈՒԹ)
04-09-2018 17:34:08 | Հայաստան | Հասարակություն
Ռուսաստանաբնակ հայ բիզնեսմեններին ներքին կարգով ասված է, որ ՀՀ գումար չուղարկեն:
Այս մասին սեպտեմբերի 4-ին լրագրողների հետ հանդիպման ժամանակ նշեց քաղտեխնոլոգ Կարեն Քոչարյանը:
Ըստ նրա՝ Ռուսաստանի հետ հարաբերությունները մեղմ ասված լավ չեն և դա ակնհայտ էր դեռ երկու ամիս առաջ:
«Սերգեյ Լավրովի հայտարարությունից հետո գոնե ինձ համար համոզիչ չէր միտինգի ժամանակ Նիկոլ Փաշինյանի հայտարարությունը, թե Ռուսաստանի հետ հարաբերությունները լավ են: Ես գիտեի, որ լավ չեն, քանի որ հետևում եմ ռուսական մամուլին»,- ընդգծեց Կ. Քոչարյանը:
Վերջինիս խոսքերով՝ ռուսական մամուլը հրապարակում է վերևից ուղղահայաց տրվող տեղեկատվությունը, իսկ դրանցում հնչող գնահատականներն ակնհայտ կոշտ են:
Անդրադառնալով վարչապետ Նիկոլ Փաշինյանի և ՌԴ նախագահ Վլադիմիր Պուտինի առաջիկա հանդիպմանը՝ քաղտեխնոլոգը չբացառեց, որ բանակցություններ ընթանան նաև Արցախյան խնդրի շուրջ:
«Առայժմ ռուսական կողմը բաց հայտարարում է Յուրի Խաչատուրովի մասով, իսկ մնացած բոլոր առումներով ընդամենը մեսիջներ են հնչում»,- նկատեց Կ. Քոչարյանը՝ հավելելով, որ ՌԴ-ի, Չինաստանի, Իրանի կամ ԱՄՆ-ի նման երկրները երբեք չեն ադապտացվելու Հայաստանի, այլ հակառակը: