Անդրեյ Շուգարովի անհատական ցուցահանդեսը կգործի մինչև նոյեմբերի 9-ը (ՏԵՍԱՆՅՈՒԹ)
03-11-2018 18:11:55 | Հայաստան | Մշակույթ
Երևանում բացվել է Անդրեյ Շուգարովի նկարների ցուցահանդեսը:
Նկարիչների միությունում ցուցադրված շուրջ 60 նկարում առանձնահատուկ տեղ ունեն ձիերը, որոնք աչքի են ընկնում ագրեսիվությամբ:
«Այստեղ 60 նկար կա, որոնք երկու տարվա աշխատանքի արդյունք են, սակայն այս նկարներից որոշներն արդեն ցուցադրվել են։ Ձին իմ սիրելի կենդանին է, և որոշ ժամանակ ես հիմնականում ձիերով եմ զբաղվել, բայց նաև նկարում եմ մարդկանց, բնությունը»,- լրագրողների հետ զրույցում նշեց Ա․ Շուգարովը։
Վերջինս իր պատկերած դիմանկարներում, նատյուրմորտներում ու բնանկարներում օգտագործում է վառ և ընդգծված երանգներ, որոնք ինչպես նկարիչն է ասում, ծնվում են բազմաթիվ գույների քաոսից:
Շուգարովի 60-ամյակին նվիրված ցուցահանդեսի հիմնական նախաձեռնողը նրա կինն է՝ դերասանուհի Ռուզան Մեսրոպյանը:
«Շատ էմոցիաներ եմ ապրել այս ընթացքում, որովհետև տասը տարվա ընթացքում որպես հայ մարդ, ով ապրում է Հայաստանում, դժվարություններ է հաղթահարում, իսկ տասը տարին քիչ չէ․ ամուսինս լինելով այսքան տաղանդավոր նկարիչ՝ այնպիսի պահեր է ապրել, նույնիսկ պահ կար, որ իրեն թվում էր, թե իր մեջ ապրող նկարիչը մահացել է, իսկ ես հավատում էի, որ այդպես չէ»,- ընդգծեց Ռ․ Մեսրոպյանը՝ հավելելով, որ ցուցահանդեսն իրականություն է դարձել նաև հավատարիմ ընկերների աջակցությամբ։
Ռուզան Մեսրոպյանի բնութագրմամբ՝ Անդրեյ Շուգարովն արտաքուստ որքան էլ բնավորությամբ հանգիստ մարդու տպարվորություն թողնի, միևնույն է՝ նա անհանգիստ ու ալեկոծ հոգի ունի, որն անվերջ փնտրտուքների մեջ է:
Ա. Շուգարովի անհատական ցուցահանդեսը կգործի մինչև նոյմեբերի 9-ը: