Հայաստանի բնակչության համար այս տարի գազի սակագինը չի բարձրանա, ներքին պարտք չի կուտակվի. Վարչապետ
13-02-2019 16:23:31 | Հայաստան | Տնտեսություն
Հայաստանի բնակչության համար այս տարի գազի սակագինը չի բարձրանա, այսօր խորհրդարանի ամբիոնից ասաց վարչապետ Նիկոլ Փաշինյանը: Լուսավոր Հայաստան խմբակցության պատգամավոր Արման Բաբաջանյանը վարչապեին հարց ուղղեց գազի գնի մասին: Նա հարցրեց՝ եթե բանակցությունների արդյունքում չգտնվեն ծախսերի կրճատման հնարավոր ուղիները, կստացվի, որ ներքին պարտք է կուտակվում: Արդյոք կա պատկերացում, թե ինչպես է այդ պարտքը մարվելու, ինչ գույքով:
“Ես ձեր մտքերի ընթացքը չեմ հասկանում, իսկ ով ասաց, որ ներքին պարտք է կուտակվել: Ես շատ հստակ այդ մասին հայտարարել եմ: Ես ասել եմ, որ գազի գինը չի բարձրանալու, դուք ասում եք, որ փաստորեն հայտարարել եմ, որ գազի գինն արդեն բարձրացել է: Պետությունը գազ չի գնում, գազը գնում է Գազպրոմ Արմենիա ընկերությունը: Եվ Գազպրոմ Արմենիա ընկերությունն ինչքանով է գնում գազը, դա ուրիշ թեմա է, իսկ պետությունը գործ ունի ՀՀ սպառողների հետ, և մենք ասել ենք, որ 2019 թվականին չի բարձրանա գազի գինը: Այստեղ կա հայ-ռուսական հարաբերությունների հարթության վրա հարցի քննարկման անհրաժեշտություն, և կա ԵՏՄ շրջանակներում այդ թեմայի քննարկման անհրաժեշտություն”,- ասաց նա:
Ըստ Փաշինյանի՝ պատգամավորի խոսքում ակնարկ կար ՀայՌուսգազարդի հայտնի պայմանագրի մասին, որի դիմաց բաժնետոմսեր տրվեցին ընկերությանը: Այսպիսի բան, ըստ Փաշինյանի, չի լինելու: Համենայնդեպս, 2019 թվականի համար որևէ նման սխեմա չի գործելու: Խնդիր է դրված ընկերության ծախսերի օպտիմալացման ու արդյունավետության շրջանակներում հարցի լուծման:
ՀԱՅԵՐԵՆ
Русский
English
Դաս. հայերեն
French
