Սահմանադրական դատարանում առկա է ճգնաժամ՝ անկախ նրանից կլիներ Վահե Գրիգորյանի նամակը և հայատրարությունը, թե չէ. ԱԺ նախագահ (ՏԵՍԱՆՅՈՒԹ)
28-06-2019 16:30:59 | Հայաստան | Քաղաքական
Սահմանադրական դատարանում առկա է ճգնաժամ՝ անկախ նրանից կլիներ Վահե Գրիգորյանի նամակը և հայատրարությունը, թե չէ:
Այս մասին հունիսի 28-ին լրագրողների հետ ճեպազրույցում նշել է Ազգային ժողովի նախագահ Արարատ Միրզոյանը:
Ըստ նրա՝ պետական կարևորագույն ինստիտուտներից մեկի՝ ՍԴ-ի, նկատմամբ չկա հանրային վստահություն, և այն տարիներ շարունակ եղել է հարցերը պարտակող, լղոզող կառույց:
«Սա ճգնաժամ է՝ անկախ նրանից օրվա իշխանությունների քիմքին ով է հաճելի, ով չէ. այդպես չէ, այդ պրիզմայով չպետք է նայել այս հարցին»,- նկատեց Ա. Միրզոյանը:
Լրագրողի այն հարցին, թե արդյո՞ք գործող իշխանությունը խնդիր է դրել փոխել Հրայր Թովմասյանին, խորհրդարանի ղեկավարը պատասխանեց.
«Հրայր Թովմասյանին փոխելու խնդիր դրված տեսականորեն լինել չի կարող, որովհետև որևէ մեկը՝ լինի դա ԱԺ-ը, Հանրապետության նախագահը, կառավարությունը, վարչապետը, այս կամ այն կուսակցությունն այդպիսի իրավասությամբ ու լիազորությամբ օժտված չէ: ՍԴ-ում խնդրի հանգուցալուծման մեջ մեծ ավանդ պետք է ունենան բոլորը, և առաջին հերթին Հրայր Թովմասյանը: Այստեղ իր ունեցած ավանդն իսկապես կարող է անգնահատելի լինել, և ես մեծ հույս ու ակնկալիք ունեմ, որ պարոն Թովմասյանն իր ծանրակշիռ խոսքը կասի դեպի հանգուցալուծում»:
Ա. Միրզոյանի կարծիքով՝ անգամ Հրայր Թովմասյանի ՍԴ նախագահի պաշտոնից հեռանալը չի հանգուցալուծի այդ կառույցում առկա ճգնաժամը, քանի որ հանրային անվսատահությունը ոչ թե անձի, այլ կառույցի նկատմամբ է:
ՀԱՅԵՐԵՆ
Русский
English
Դաս. հայերեն
French
