Թուրքիայի արտաքին քաղաքականությունը մտել է շատ վտանգավոր փուլ իր բոլոր հարևանների համար. Ռուբեն Սաֆրաստյան (ՏԵՍԱՆՅՈՒԹ)
10-01-2020 15:28:33 | Հայաստան | Քաղաքական
Թուրքիայի արտաքին քաղաքականությունը մտել է շատ վտանգավոր մի փուլ իր բոլոր հարևանների համար:
Այս մասին հունվարի 10-ին լրագրողների հետ հանդիպման ժամանակ նշեց Հայաստանի Գիտությունների ազգային ակադեմիայի արևելագիտության ինստիտուտի տնօրեն, ակադեմիկոս Ռուբեն Սաֆրաստյանը՝ անդրադառնալով Մերձավոր Արևելքում առաջած լարված իրավիճակին ու զարգացումներին:
Ըստ նրա՝ Մերձևավոր Արևելքի հետ կապված Թուրքիան ունի իր հստակ ձևակերպած նպատակը, այն է՝ դառնալ տարածաշրջանային առումով առաջատար պետություն, որոշումներ ընդունող ուժային կենտրոն:
«Եթե մենք նայում ենք այս տեսանկյունից, փորձում ենք հասկանալ Թուրքիայի քաղաքականությունը Մերձավոր Արևելքում վերջին տարիներին, ապա տեսնում ենք, որ Թուրքիայի գործողությունները հենց այդ նպատակին էլ հասնում են»,- նկատեց Ռ. Սաֆրաստյանը:
Նրա խոսքերով՝ ներկայումս ունենք այն, որ Թուրքիան իր զինված ուժերով ագրեսիա է իրականացրել և ներկայություն ապահովել Հյուսիսային Սիրիայում՝ ըստ էության օկուպացնելով այդ հատվածում շուրջ 8000 քառակուսի կիլոմետր տարածք:
«Թուրքիան չի զլանում օգտագործել իր զինված պոտենցիալը, որը բավական ուժեղ է, ինչը կրկնում եմ շատ վտանգավոր է: Ինչ վերաբերում է կոնկրետ Սիրիային, ապա Սիրիայում մենք տեսանք, որ հնարավոր եղավ թուրքերի և ռուսների միջև որոշակի համաձայնություն այս տարիների ընթացքում, որի արդյունքում կարծես թե այստեղ հարված հասցվեց Իսլամական պետությանը: Բայց այստեղ մնում է Իդլիբ նահանգի խնդիրը, որը կարևոր է և իմ կարծիքով՝ այն դեռևս չի գտել իր լուծումը ռուս-թուրքական բանակցություններում»,- ընդգծեց բանախոսը:
Վերջինս անդրադառնալով ԱՄՆ-Իրան հարաբերություններին՝ նշեց, որ այս պահին ավարտվել է ամերիկա-իրանյան հակամարտության առաջին տակտիկական փուլը, հաջորդ փուլը ռազմավարական հարթությունում է:
Ռ. Սաֆրաստյանի փոխանցմամբ՝ ռազմավարական հարթությունում շատ կարևոր խնդիրներ են քննարկվելու, որոնցից է մեկն էլ այն է, որ Իրանը շատ հստակ դիրքորոշում ունի Մերձավոր Արևելքում ամերիկյան զինված ուժերի ներկայությանը վերջ տալու հետ կապված:
ՀԱՅԵՐԵՆ
Русский
English
Դաս. հայերեն
French
