Լիբանանի նախագահը Իսրայելին մեղադրել է երկրում
կրոնական թշնամանք բորբոքելու ցանկության մեջ
04-06-2009 16:10:00 | Լիբանան | Միջազգային
ԲԵՅՐՈՒԹ, 4 ՀՈՒՆԻՍԻ, ՆՈՅՅԱՆ ՏԱՊԱՆ: Լիբանանի նախագահ Միշել
Սուլեյմանը հարեւան Իսրայելին մեղադրել է «լրտեսական ագենտուրայի
միջոցով երկրում կրոնական թշնամանք բորբոքելու» ձգտման մեջ:
Լիբանանի ղեկավարը հինգշաբթի այցելել է Ազգային անվտանգության
վարչության կենտրոնակայան եւ հատուկ ծառայությունների
աշխատակիցներին անձամբ շնորհավորել իսրայելական գործակալների
ընդհատակյա ցանցի հայտնաբերման հաջողությամբ իրականացված
գործողության առթիվ:
Լիբանանի ԶԼՄ-ների տեղեկություններով, վերջին երկու ամիսներին
ձերբակալվել է ավելի քան 35 մարդ, որոնք խոստովանել են, որ գործել
են իսրայելական հետախուզության համար: Դրանց թվում կան մի քանի
զինծառայողներ, այդ թվում բարձր պաշտոններ զբաղեցնող երկու գնդապետ
եւ երկու պաշտոնաթող գեներալ:
Քննության նյութերին ծանոթանալով, ինչպես հաղորդում է
«Ալ-Վաթանիա» լրատվական գործակալությունը, Սուլեյմանը Լիբանանի դեմ
լրտեսությունը համարել է «տեռորի եւ ագրեսիաների իսրայելական
քաղաքականության շարունակություն»: Ըստ նրա, Իսրայելը «չի
դադարեցնում լիբանանյան պետությունը պառակտելու փորձերը»: