ՏԱՇՔԵՆԴ, 26 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 26-ին Ուզբեկստանը լրիվ փակել է Ղրղզստանի հետ սահմանը: Այդ որոշման պատճառը չի հաղորդվում, սակայն ավելի վաղ ղրղզական լրատվամիջոցները հաղորդել էին ուզբեկական Խանաբադ քաղաքի խժդժությունների մասին: Ղրղզստանի սահմանապահ ծառայությունը որոշում է ընդունել փակել Ուզբեկստանի հետ սահմանը ուզբեկական կողմի նախաձեռնությամբ, «Նովոստի» գործակալությանը հայտնել է սահմանապահ ծառայության ներկայացուցիչը` հրաժարվելով նշել այդ որոշման պատճառը: Դրանից բացի, Ղրղզստանի ՆԳՆ մամլո ծառայության ներկայացուցիչը հայտնել է, որ ղրղզա-ուզբեկական սահմանի ուզբեկական կողմում` «Խանաբադ» պահակակետում փոխհրաձգություն է տեղի ունեցել, ենթադրաբար կան վիրավորներ: Ավելի վաղ հաղորդվել էր, որ Ուզբեկստանում անհայտ անձինք հարձակվել են Խանաբադ քաղաքի միլիցիայի բլոկ-պոստի վրա: Ուզբեկստանի գլխավոր դատախազությունը հաստատել է այս տեղեկատվությունը:

---