Եթե արտակարգ իրավիճակի որոշողը Ծառուկյանը լիներ, ապա այնպես կաներ, որ ամեն ինչ իր տեղում լիներ. ԲՀԿ ղեկավար
23-03-2020 13:16:08 | Հայաստան | Քաղաքական
Եթե արտակարգ իրավիճակի որոշողը Ծառուկյանը լիներ, ապա այնպես կաներ, որ ամեն ինչ իր տեղում լիներ:
Այս մասին մարտի 23-ին ԱԺ-ում լրագրողների հետ ունեցած ճեպազրույցում հայտարարեց «Բարգավաճ Հայաստան» խմբակցության ղեկավար Գագիկ Ծառուկյանը՝ պատասխանելով լրագրողի այն հարցին, թե որպես խոշոր սեփականատեր՝ ինչ է պատրաստվում անել արտակարգ դրության պայմաններում պետությանն աջակցելու առումով:
Ըստ նրա՝ այսօր պետությունը որպես ընտանիքի հայր՝ պետք է մտածի իր ժողովրդի, աշխատողի, թոշակառուի մասին, իսկ ինքը սովորական քաղաքացի է, ով ենթարկվում է արտակարգ դրության պայմաններին:
Գ. Ծառուկյանի խոսքերով՝ ով արտակարգ դրություն է հայտարարել, նա էլ պարտավոր է վճարել այս օրերին հարկադիր պարապուրդի մատնված քաղաքացիներին, այդ թվում իր աշխատողներին:
«Տնտեսությունն այսօր անդունդի եզրին կանգնած է, եթե խելացի քայլեր չկատարվեն, ուրեմն ես կարող եմ ասել՝ բոլորը թափվելու են անդունդը և դժվար է լինելու վերականգնելը: Այսօր չի կարելի թերագնահատել մեկը մյուսին, այսօր ազգովի ենք տուժում, այսօր պետք է միասնական լինենք, իրար կողքի կանգնելով»,- ընդգծեց ԲՀԿ առաջնորդը:
Նա նկատեց, որ գործարարներին այնպիսի արտոնություններ չեն տրվել, որ վերջիններս չիմանան` ինչպես ]ծախսել փողերը.
«Հարկայինից սկսած դրած սաղի կաշիները քերթելով՝ բյուջեն լցնում են: Հիմա ասենք հունվար-փետրվար ամիսներին 25 մլրդ պակաս գումար է եկել, սկի բյուջեն չեն կարողանալու լցնեն»: