Երեւանի դպրոցների բուֆետներում վաճառվող սննդամթերքը չի
համապատասխանում սննդամթերքի անվտանգության պահանջներին
04-05-2009 18:15:00 | Հայաստան | Տնտեսություն
ԵՐԵՎԱՆ, 4 ՄԱՅԻՍԻ, ՆՈՅՅԱՆ ՏԱՊԱՆ: ՀՀ Գյուղատնտեսության
նախարարության Սննդամթերքի անվտանգության եւ անասնաբուժական
պետական տեսչությունը հունվար-մարտին ստուգումներ է իրականացրել
Երեւանի եւ հանրապետության մարզերի 710 տնտեսվարող սուբյեկտներում,
որից 475-ը` խանութներում, 160-ը` հանրային սննդի
կազմակերպություններում (ռեստորան, սրճարան եւ այլն), 75-ը`
արտադրամասերում: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց
տեսչության իրավական ապահովման եւ տեղեկատվության բաժնի պետ
Սուսաննա Մինասյանը, անցկացված ստուգումների արդյունքում
տնտեսվարող սուբյեկտները ենթարկվել են վարչական պատասխանատվության:
Տուգանքների ընդհանուր գումարը կազմել է 33 մլն 440 հազ. դրամ:
Ս.Մինասյանը նշեց, որ մայիսի 1-ը ներառյալ հանրապետությունում
ստուգումներ է իրականացվել 940 տնտեսվարող սուբյեկտներում, որոնցից
230-ի ստուգման արդյունքները ամփոփման փուլում են:
Նրա խոսքերով, առավել հաճախ արձանագրվող խախտումների թվում է
պիտանելիության ժամկետն անցած, առանց համապատասխան մակնշման, առանց
սերտիֆիկատների կամ համապատասխան տեխնոլոգիական հրահանգների
սննդամթերքի վաճառքը: Միաժամանակ նշվեց, որ վերջին շրջանում
հանրային սննդի օբյեկտներում նվազել են կենդանական ծագման
սննդամթերքների առանց անասնաբուժասանիտարական փորձաքննության
վաճառքի դեպքերը:
Ս.Մինասյանը հայտնեց, որ տեսչությունը ներկայումս ստուգումներ
է իրականացնում Երեւանի 10 հանրակրթական դպրոցներում: Նշվեց, որ
2008թ.-ին ընդհանուր առմամբ ստուգվել է 71 դպրոց, որոնցից միայն
17-ում խախտումներ չեն հայտնաբերվել: Ստուգումների արդյունքում
պարզվել է, որ դպրոցների բուֆետներում վաճառվող սննդամթերքը չի
համապատասխանում սննդամթերքի անվտանգության պահանջներին: