Մայիսի սկզբին նախատեսվում է JICA-ի առաքելության այցը
Հայաստան
19-03-2009 17:00:00 | Հայաստան | Տնտեսություն
ԵՐԵՎԱՆ, 19 ՄԱՐՏԻ, ՆՈՅՅԱՆ ՏԱՊԱՆ: Հայաստանի տրանսպորտի եւ
կապի նախարար Գուրգեն Սարգսյանը մարտի 18-ին ընդունել է Ճապոնիայի
միջազգային համագործակցության գործակալության (JICA) Կենտրոնական
Ասիայի եւ Կովկասի բաժնի պետ Կենիչի Յամատոտոյին: Կարեւորելով
գործակալության հետ սերտ համագործակցությունը, նախարարը նշել է, որ
այն կնպաստի Հայաստանի տնտեսության զարգացմանը: Անդրադառնալով
գործակալության կողմից Հայաստանի գյուղական ճանապարհների
վերանորոգմանն ուղղված նոր վարկային ծրագրի կազմման գործընթացին,
Գ.Սարգսյանը տեղեկացրել է, որ այն արդեն ավարտական փուլում է, եւ
առաջիկայում փաստաթղթերը վերջնական տեսքի կբերվեն:
JICA-ի ներկայացուցիչը մանրամասն ներկայացնելով գյուղական
ճանապարհների վերանորոգման վարկային ծրագիրը, նշել է, որ այն
կկազմի մոտ 50-100 մլն ԱՄՆ դոլար եւ կտրամադրվի արտոնյալ
պայմաններով: Ըստ նրա, մայիսի սկզբին նախատեսվում է JICA-ի
առաքելության այցը Հայաստան, որի ընթացքում մանրամասն կքննարկվեն
վարկային համաձայնագրի պայմանները, ֆինանսավորման կոնկրետ չափը եւ
ժամկետները: Կ.Յամատոտոն հավաստիացրել է, որ երկկողմ
բանակցությունների հաջող ընթացքի դեպքում վարկային համաձայնագիրը
Հայաստանի հետ մինչեւ տարեվերջ կստորագրվի:
Ըստ ՀՀ տրանսպորտի եւ կապի նախարարի մամուլի քարտուղար
Սուսաննա Տոնոյանի, հանդիպման ընթացքում կողմերը անդրադարձել են
նաեւ ճանապարհների պահպանության խնդրին, որի լուծման համար
հնարավոր է նաեւ JICA-ի ֆինանսական եւ տեխնիկական աջակցությունը: