Դրամի արժեվորումը վնասեց Հայաստանում տեղական արտադրության
զարգացմանը,- ասում է Վազգեն Սաֆարյանը
06-03-2009 19:00:00 | Հայաստան | Տնտեսություն
ԵՐԵՎԱՆ, 6 ՄԱՐՏԻ, ՆՈՅՅԱՆ ՏԱՊԱՆ: Դրամի արժեվորումը դոլարի
նկատմամբ վնասեց Հայաստանում տեղական արտադրության զարգացմանը,
ինչի պատճառով 2008թ.-ին արտահանումը նվազել է 7,8%-ով եւ կազմել 1
մլրդ 69 մլն դոլար, իսկ ներմուծումն աճել է 35%-ով եւ կազմել 4
մլրդ 411,7 մլն դոլար: Նման կարծիք հայտնեց մարտի 6-ի ասուլիսում
Հայրենական ապրանք արտադրողների միության նախագահ Վազգեն
Սաֆարյանը:
Նրա գնահատմամբ, ազգային արժույթի լողացող փոխարժեքը
հնարավորություն կտա զարգացնել տեղական արտադրությունը: Նա նաեւ
նշեց, որ պետությունը պետք է վերանայի այն մոտեցումներն ու
կարծրատիպերը, որոնք խանգարում են երկրի տնտեսության զարգացմանը:
Ըստ Վ.Սաֆարյանի, պետությունը պետք է կարգավորի եւ կառավարի
տնտեսությունը: «Հայաստանում վերջին երկու տասնամյակների ընթացքում
վարվում էր ազատ շուկայական տնտեսության ցնցումնաբուժության
քաղաքականություն: Դա բերել է մի իրողության, որ ունենք
հարուստների սակավաթիվ խավ եւ շատ ծանր պայմաններում հայտնված
հսկայական զանգված»,- ասաց միության նախագահը:
Վ.Սաֆարյանը վստահ է, որ օպերատիվ պետական գործողությունների,
միջոցառումների միջոցով հնարավոր է մոտ 1,5 անգամ ավելացնել
արտահանման եւ 2 անգամ կրճատել ներկրման ծավալները: