Հայաստանի ՔրՕր-ի 225 եւ 300 հոդվածներում փոփոխությունների
օրինագիծը հնարավոր է քննարկվի ԱԺ-ի հաջորդ քառօրյա նիստերում
05-02-2009 22:00:00 | Հայաստան | Քաղաքական
ԵՐԵՎԱՆ, 5 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի Քրեական
օրենսգրքի 225 («Զանգվածային անկարգություններ») եւ 300 («Պետական
իշխանությունը յուրացնելը») հոդվածներում փոփոխություններ եւ
լրացումներ կատարելու մասին օրենքի նախագծի մշակման նպատակով
ստեղծված աշխատանքային խումբը փետրվարի 5-ին գումարել է իր
անդրանիկ նիստը: Խմբի ղեկավար, ԱԺ-ի Պետաիրավական հարցերի մշտական
հանձնաժողովի նախագահ, Եվրոպայի Խորհրդի Խորհրդարանական
վեհաժողովում հայկական պատվիրակության ղեկավար Դավիթ
Հարությունյանը նշել է, որ Քրեական օրենսգրքի համապատասխան
հոդվածներում նախատեսվող փոփոխությունների նպատակը երկուսն են`
իրավական որոշակիության սկզբունքի արտացոլումը նշված հոդվածներում
եւ դրանց համապատասխանեցումը եվրոպական չափանիշերին: Անդրադառնալով
քննարկվող հոդվածներին, նա ասել է, որ դրանց իրավական
ձեւակերպումները հաջողված չեն. մասնավորապես 300 հոդվածը, որը
վերաբերում է իշխանության յուրացմանը, ինքնահակասական
նախադասություն է, քանի որ ասվում է` իշխանության զավթում` առանց
Սահմանադրությունը խախտելու: Նշվել է այլ օրինակ եւս` «Ինչպես նաեւ
Հայաստանի Հանրապետության սահմանադրական կարգը բռնությամբ
տապալելուն ուղղված գործողությունները»: Ըստ նրա, նախ պետք է
սահմանել, թե ինչ է «սահմանադրական կարգը», քանի որ հոդվածի
ձեւակերպումը տարածական մեկնաբանությունների տեղիք է տալիս: 225
հոդվածի առնչությամբ էլ, որը վերաբերում է զանգվածային
անկարգություններին, նշվել է, որ այն չի սահմանում, թե ինչը կարելի
է համարել զանգվածային անկարգություն:
Նիստից հետո Դ.Հարությունյանը լրագրողներին հայտնեց, որ նիստը
զուտ աշխատակարգային էր. խումբը ծրագրավորել է իր հետագա անելիքը:
Բացի այդ, խմբի անդամներից երեքը ներկայացրել են լրամշակվելիք
հոդվածների վերաբերյալ իրենց վերլուծությունները, որոնք
առաջիկայում կդառնա քննարկման առարկա:
Դ.Հարությունյանը հույս հայտնեց, որ հաջորդ շաբաթվա ընթացքում
հրավիրվելիք նիստում խումբը քննարկման համար արդեն կունենա որոշակի
գրավոր նյութ: Նա չբացառեց, որ անհրաժեշտության դեպքում խումբը
կհրավիրի տեղական փորձագետներ, իսկ առաջին ընթերցմամբ ընդունվելուց
հետո մինչեւ երկրորդ ընթերցումը դիմի նաեւ եվրոպական
փորձագետներին: Խմբի ղեկավարի կարծիքով, եթե աշխատանքը ընթանա
ծրագրված հունով, ամենայն հավանականությամբ, ԱԺ-ի փետրվարի 23-ին
մեկնարկելիք քառօրյա նիստերում ՔրՕր-ի երկու հոդվածներում
փոփոխությունների եւ լրացումների նախագիծը կներկայացվի առաջին
ընթերցմամբ քննարկման: