Հայաստանի պետական պաշտոնյաները հաճախ անպատասխան են թողնում
պատգամավորների հարցումները
03-02-2009 23:00:00 | Հայաստան | Քաղաքական
ԵՐԵՎԱՆ, 3 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի պաշտոնյաները
հաճախ ժամանակին չեն պատասխանում Ազգային Ժողովի պատգամավորների
հարցերին, դրանով իսկ խախտելով ԱԺ կանոնակարգ-օրենքը: Այս մասին
փետրվարի 3-ին խորհրդարանում հայտարարեց «Ժառանգություն»
խմբակցության անդամ Անահիտ Բախշյանը:
Պատգամավորը հիշեցրեց, որ ըստ օրենքի, պաշտոնյաները պետք է
տասնօրյա ժամկետում գրավոր պատասխան տան պատգամավորի հարցմանը կամ
կազմակերպեն քննարկում պատգամավորի մասնակցությանմբ, որին
հրավիրվելու մասին վերջինիս պետք է տեղեկացնեն 3 օր առաջ: Մինչդեռ
պատգամավորների հարցերի պատասխանները ուշանում են կամ իսպառ չեն
տրվում, իսկ նամակներն անգամ անհայտանում են:
Ըստ Ա.Բախշյանի, նման դեպքեր հաճախակի են գրանցվում Երեւանի
քաղաքապետարանում, ուր վերջերս «կորել Է» ապօրինի շինարարության 7
դեպքերի վերաբերյալ պատգամավորի նամակը: Ըստ նրա, հաճախ
պատասխաններ չեն տրվում պաշտոնյաների կողմից օրենքներին անտեղյակ
լինելու, հարցին չտիրապետելու, անգամ համապատասխան կրթություն
չունենալու պատճառով: Եթե պետական պաշտոնյաները նման վերաբերմունք
են դրսեւորում պատգամավորների հարցերի նկատմամբ, ապա սովորական
քաղաքացիները, ըստ Ա.Բաշխյանի, առավել եւս չեն կարող հավակնել
նրանց ուշադրությանը: