«Յոթի գործով» դատական նիստին զուգահեռ դարձյալ տեղի ունեցավ
ընդդիմադիրների բողոքի ակցիան
30-01-2009 16:40:00 | Հայաստան | Քաղաքական
ԵՐԵՎԱՆ, 30 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 30-ին արմատական
ընդդիմության կողմնակիցները Երեւանի Շենգավիթ համայնքի ընդհանուր
իրավասության դատարանի մոտ, որտեղ տեղի էր ունենում «Յոթի գործով»
դատական նիստը, կազմակերպել էին հերթական բողոքի ակցիան:
Ցուցարարները պարզել էին «Ազատություն հրաշալի յոթնյակին»,
«Ազատություն հիմա» գրությամբ պաստառները ու ամբաստանյալների
նկարները: Ակցիայի ողջ ընթացքում նրանք վանկարկում էին «Ազատ,
անկախ Հայաստան», «Պայքար, պայքար մինչեւ վերջ»:
Անսալով դատարանի դահլիճ չմտնելու վերաբերյալ Հայ ազգային
կոնգրեսի հունվարի 29-ի կոչին, ցուցարարները մինչեւ դատական նիստի
ավարտը մնացին շենքի բակում: Ակցիային հետեւում էին տասնյակ
ոստիկաններ եւ կարմիր բերետավորներ, որոնք նիստից հետո փակել էին
մայթը` չթույլատրելով մարդկանց շարժը դեպի քաղաքի կենտրոն: Նիստից
հետո ակցիայի մասնակիցները ծափողջույններով ճանապարհեցին
ամբաստանյալներին եւ պայմանավորվեցին ակցիան շարունակել ժամը 14-ին
ՀՀ Գլխավոր դատախազության շենքի մոտ: