Հայաստանի դեսպանն իր հավատարմագրերն է հանձնել Չինաստանի
նախագահին
15-01-2009 22:00:00 | Չինաստան | Քաղաքական
ՊԵԿԻՆ, 15 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 15-ին ՉԺՀ-ում ՀՀ
դեսպան Արմեն Սարգսյանն իր հավատարմագրերն է հանձնել Չինաստանի
Ժողովրդական Հանրապետության նախագահ Հու Ձինթաոյին: Հանձնման
արարողությունից հետո տեղի ունեցած զրույցի ընթացքում մտքեր են
փոխանակվել երկկողմ հարաբերությունների ներկա մակարդակի եւ հետագա
զարգացման հեռանկարների մասին:
Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ
ՏԱՊԱՆ»-ին տրամադրած հաղորդագրության, Չինաստանի նախագահը խնդրել է
փոխանցել իր բարեմաղթանքները ՀՀ նախագահին: Անդրադառնալով Հայաստան
այցելելու Սերժ Սարգսյանից ստացված հրավերին` Հու Ձինթաոն հայտնել
է, որ շնորհակալությամբ ընդունում է այն:
Հաջողություններ մաղթելով Ա.Սարգսյանին, Հու Ձինթաոն ասել է,
որ Հայաստանի դեսպանը երկկողմ հարաբերությունների ամրապնդման եւ
խորացման իր առաքելության կատարման ընթացքում կունենա Չինաստանի
կառավարության ամենայն աջակցությունը: