Հունվարի 15-ին Երեւան կժամանեն ԵԽԽՎ-ի մոնիտորինգի
հանձնաժողովի համազեկուցողները
12-01-2009 20:00:00 | Հայաստան | Քաղաքական
ԵՐԵՎԱՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 15-ին Երեւան
կժամանեն ԵԽԽՎ-ի մոնիտորինգի հանձնաժողովի համազեկուցողներ Ջոն
Պրեսկոտը, Ժորժ Կոլոմբիեն եւ հանձնաժողովի քարտուղար Բաս Քլայնը:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ ԱԺ-ի Հասարակայնության հետ
կապերի վարչությունից, համազեկուցողների այցի շրջանակում
նախատեսված են հանդիպումներ ԵԽ Գլխավոր քարտուղարի հատուկ
ներկայացուցիչ Սիլվիա Զեհեի, ՀՀ գլխավոր դատախազ Աղվան Հովսեփյանի
եւ ՀՀ մարդու իրավունքների պաշտպան Արմեն Հարությունյանի հետ:
ՀՀ Ազգային Ժողովում համազեկուցողներին կընդունեն ՀՀ ԱԺ
նախագահ Հովիկ Աբրահամյանը, ԵԽԽՎ-ում ԱԺ պատվիրակության ղեկավար
Դավիթ Հարությունյանը, ԱԺ 2008թ. մարտի 1-2-ին Երեւանում տեղի
ունեցած իրադարձությունների եւ դրանց պատճառների ուսումնասիրության
ժամանակավոր հանձնաժողովի նախագահ Սամվել Նիկոյանը, փորձագետների
փաստահավաք խմբի անդամները:
Հունվարի 15-ին Ջ.Պրեսկոտին եւ Ժ.Կոլոմբիեին կընդունի ՀՀ
նախագահ Սերժ Սարգսյանը:
Հունվարի 16-ին համազեկուցողները եւ հանձնաժողովի քարտուղարը
կմեկնեն Երեւանից: