ՀՀ սփյուռքի նախարարն ընդունեց սփյուռքահայ ուսանողների
խորհրդի անդամներին
20-05-2010 20:30:00 | Հայաստան | Հասարակություն
ԵՐԵՎԱՆ, 20 ՄԱՅԻՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Մայիսի 20-ին
ՀՀ սփյուռքի նախարար Հրանուշ Հակոբյանն ընդունեց Հայաստանի
բարձրագույն եւ միջին մասնագիտական ուսումնական հաստատությունների
սփյուռքահայ ուսանողների խորհրդի անդամներին:
ՀՀ սփյուռքի նախարարությունից ստացած հաղորդագրության
համաձայն, ողջունելով սփյուռքահայ ուսանողներին` տիկին Հ.Հակոբյանը
նրանց ծանոթացրեց նախարարության գործունեությանը եւ առաջիկա
ծրագրերին:
Խոսելով 21-րդ դարում գիտելիքի կարեւորության մասին` նախարարն
ուսանողներին խորհուրդ տվեց լավ սովորել եւ մեծ ուշադրություն
դարձնել իրենց ընտրած մասնագիտությամբ կատարելագործվելու խնդրին:
Նա հորդորեց երիտասարդներին հնարավորինս զերծ մնալ
խառնամուսնություններից, շատ զավակներ ունենալ եւ ունենալ առողջ
ապրելակերպ:
Սփյուռքահայ ուսանողները նախարար Հ.Հակոբյանին ներկայացրեցին
մանրամասներ մայիսի 1-9-ը կայացած «Բանակ-18» Երեւան-Շուշի
մրցույթ-արշավի ընթացքում սփյուռքահայ ուսանողների խորհրդի կողմից
ձեւավորված «Սփյուռք» թիմի մասնակցության վերաբերյալ: