ԼԵՅԴԵՆ, 7 ՄԱՅԻՍԻ, ՆՈՅՅԱՆ ՏԱՊԱՆ: Լեյդենի համալսարանի
գրադարանում մայիսի 6-ին բացվել է «Հայերը: Հնագույն
քրիստոնեությունը երիտասարդ երկրում» ցուցահանդեսը` նվիրված
1660թ.-ին Ամստերդամում հայ գրքի տպագրության 350-ամյակին: Բացման
արարողությանը ներկա էին բազմաթիվ համալսարանականներ, ուսանողներ,
Նիդերլանդների հայկական համայնքների ներկայացուցիչներ:
Ցուցահանդեսը կազմակերպվել է Լեյդենի համալսարանի պրոֆեսոր,
հայագետ Յ.Վայտենբերգի եւ Արեւելյան ցուցանմուշների համակարգող
Արնոլդ Ֆրոլայկի կողմից:
Ցուցահանդեսի պաշտոնական բացմանն ունեցած ելույթում Հաագայում
Հայաստանի հյուպատոս Արշակ Մանուկյանն ընդգծել է, որ 5-րդ դարում
հայկական գրերի գյուտը դարձավ մշակութային այն հզոր ազդակը, որի
շնորհիվ հայ պատմագրությունը, թագմանչական արվեստը, պոեզիան,
միջնադարյան փիլիսոփայությունը եւ, 16-րդ դարից սկսած, հայ տպագիր
գիրքը դարձան ոչ միայն հայ ժողովրդի, այլեւ համաշխարհային
մշակույթի եւ մտավոր հարստության անբաժան մասը:
Ըստ ՀՀ ԱԳՆ Մամուլի եւ տեղեկատվության վարչության
հաղորդագրության, բացման արարողության ժամանակ ելույթներ են
ունեցել նաեւ Յ.Վայտենբերգը, Ա.Ֆրոլայկը, Հոլանդահայ
կազմակերպությունների դաշնության նախագահ Մ.Հախվերդյանը:
Ցուցահանդեսում ներկայացված են Լեյդենի համալսարանում պահվող
հայկական ձեռագիր մատյաններ եւ տպագիր գրքեր, որոնցից է 11-րդ դարի
մագաղաթյա գիրքը` ժամանակակից թարգմանությամբ:
Համալսարանի տրամադրության տակ կա 65 ձեռագիր մատյան, որոնցից
57-ը 1985թ. համիդյան ջարդերի ժամանակ Կիլիկիայի հայերը,
ոչնչացումից փրկելու նպատակով, հանձնել են անգլիացի Ռենդել Հարիսին
(Rendel Harris), որը հետագայում դարձել է Լեյդենի համալսարանի
տնօրենը:
Ցուցահանդեսը կգործի մինչեւ հուլիսի 31-ը: