Կմշակվի պետական միջոցներով տպագրվող դասագրքերի տրամադրման
նոր կարգ
29-04-2010 21:06:00 | Հայաստան | Հասարակություն
ԵՐԵՎԱՆ, 29 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի կառավարության
ապրիլի 29-ի նիստում ՀՀ Վերահսկիչ պալատի նախագահ Իշխան Զաքարյանը
հայտարարեց, որ Հայաստանում պետական ֆինանսավորմամբ տպագրվող
դպրոցական դասագրքերի տրամադրման կարգի փոփոխման անհրաժեշտություն
կա: Ըստ նրա, չնայած տարրական դասարանների դասագրերի տպագրության
համար մեծ գումար է հատկացվում, որոնք պետք է տրամադրվեն անվճար,
սակայն շուկայում շարունակվում է դրանց վաճառքը:
Ի.Զաքարյանի խոսքերով, ուսումնասիրությունները ցույց են տվել,
որ պետական բյուջեի միջոցներով տպագրվող գրքերը 100%-ով բավարարում
են պահանջարկը: «Այդ դեպքում անհասկանալի է, թե ինչու՞ են
հրատարակիչները ավելի շատ գրքեր տպագրում, ինչ արդյունքում
դասագրքերը հայտնվում են շուկայում»,- նշեց Ի.Զաքարյանը:
ՀՀ կրթության եւ գիտության նախարար Արմեն Աշոտյանը հայտնեց,
որ գրքերի տրամադրման գործող կարգն իրեն չի արդարացնում: Ըստ նրա,
շատ դեպքերում դպրոցներից ու մարզպետարաններից ստացված հայտերը չեն
համապատասխանում դպրոցի ուսուցչի կամ տնօրենի ցանկությանը: Այստեղ
խնդիրն այն է, որ որոշ հրատարակիչներ տեղերում իրականացնում են
լոբբիստական գործունեություն: «Դպրոցները պատրաստ չեն այսօր
լավագույն բովանդակությամբ գիրք ինքնուրույն ընտրելու»,- ընդգծեց
նախարարը` հավելելով, որ հաջորդ տարվա համար պետք է փոխվեն
մեխանիզմները եւ մոտեցումները: Այսինքն, ըստ Ա.Աշոտյանի, գրքերի
ընտրությունը չպետք է կախված լինի մարզպետարանից կամ դպրոցից: