Երեւանում անցկացվում է Հայաստանի եւ Թուրքմենստանի միջեւ
տնտեսական համագործակցության միջկառավարական հանձնաժողովի երկրորդ
նիստը
07-04-2010 19:52:00 | Հայաստան | Տնտեսություն
ԵՐԵՎԱՆ, 7 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 7-ին Երեանում
մեկնարկեց Հայաստանի եւ Թուրքմենստանի միջեւ տնտեսական
համագործակցության միջկառավարական հանձնաժողովի երկրորդ նիստը:
Երկօրյա նիստում կքննարկվեն Հայաստանի եւ Թուրքմենստանի միջեւ
առեւտրատնտեսական համագործակցության, իրավապայմանագրային
զարգացմանը վերաբերող խնդիրները, ինչպես նաեւ ստանդարտացման եւ
պետական վերահսկողության, գյուղատնտեսության, գիտության, կրթության
ոլորտներում համագործակցության հնարավորությունները:
Հանձնաժողովի հայկական կողմի համանախագահն է ՀՀ էներգետիկայի
եւ բնական պաշարների նախարար Արմեն Մովսիսյանը, իսկ թուրքմենական
կողմի` Թուրքմենստանի փոխվարչապետ Խըդըր Սափարալիեւը:
Ըստ Ա.Մովսիսյանի, Հայաստանը կարեւորում է ԱՊՀ բոլոր երկրների
հետ համագործակցությունը: Թուրքմենստանի հետ Հայաստանի
համագործակցությունը հիմնված է փոխհամաձայնության եւ բարիդրացիական
հարաբերությունների վրա: Ա.Մովսիսյանը նշեց, որ երկու
պետությունները որեւէ հարցի շուրջ տարաձայնություններ չունեն, ինչը
հիմք է հանդիսանում համագործակցությունը փոխշահավետ զարգացնելու
համար:
Հայաստանի եւ Թուրքմենստանի միջեւ առեւտրաշրջանառության
ծավալները, ըստ նախարարի, բավարար մակարդակի վրա չեն: Նա
վստահություն հայտնեց, որ միջկառավարական հանձնաժողովի նիստը նոր
ներուժ կհաղորդի համագործակցության զարգացմանը:
Խ.Սափարալիեւը նշեց, որ նախորդ նիստից անցել է մեկ տարի, եւ
արդեն կարելի է խոսել արդյունքերի մասին: Ըստ նրա, որոշակի
աշխատանք է կատարվել երկու երկրների միջեւ առեւտրատնտեսական կապերն
ընդլայնելու եւ զարգացնելու ուղղությամբ: Խ.Սափարալիեւի խոսքերով,
բավական ակտիվ աշխատանք է տարվում երկու երկների մշակույթի,
կրթության եւ գիտության նախարարությունների, պետական
համալսարանների, առեւտարաարդյունաբարական պալատների միջեւ
համագործակցությունը զարգացնելու ուղղությամբ:
Նիստի շրջանակներում ապրիլի 8-ին ՀՀ կառավարության
Ընդունելությունների տանը կկազմակերպվի հայկական եւ թուրքմենական
ապրանքների ցուցահանդես-վաճառք, ինչպես նաեւ բիզնես-ֆորում:
Կողմերը պայմանավորվեցին հանձնաժողովի երրորդ նիստն անցկացնել
Աշխաբադում 2011թ.-ին: