Երեւանում մեկնարկեց «Տարածաշրջանային համագործակցության
խթանում տեղեկատվական տեխնոլոգիաների միջոցով» երկօրյա
համաժողովը
02-04-2009 15:30:00 | Հայաստան | Տնտեսություն
ԵՐԵՎԱՆ, 2 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 2-ին Երեւանում
աշխատանքն սկսեց «Տարածաշրջանային համագործակցության խթանում
տեղեկատվական տեխնոլոգիաների միջոցով» խորագրով համաժողովը`
Հայաստանի, Ռուսաստանի, Ուկրաինայի, Վրաստանի եւ Թուրքիայի
տեղեկատվական եւ հեռահաղորդակցության (ՏՀՏ) ոլորտի
ներկայացուցիչների մասնակցությամբ:
Ինչպես համաժողովի բացման խոսքում նշեց ՀՀ էկոնոմիկայի
փոխնախարար Վահե Դանիելյանը, համաժողովը Երեւանում է անցկացվում
Սեւծովյան տնտեսական համագործակցության կազմակերպությունում
(BSEC-ՍԾՏՀ) Հայաստանի կիսամյա նախագահության շրջանակներում:
Միջոցառման նախապատրաստական աշխատանքներն սկսվել են մեկ տարի առաջ:
Ըստ նրա, նշված թեմայով համաժողովի անցկացման առաջին ազդակներից էր
այն, որ տեղեկատվական տեխնոլոգիաների զարգացումը կարեւոր թեմա է
դիտարկվում ամբողջ աշխարհում: Բացի այդ, ՀՀ կառավարությունը
երկրում ՏՏ բնագավառի հաջողությունները համարում է որպես Հայաստանի
գերազանցության կենտրոն դառնալու հիմք:
Տեղեկացվեց, որ ՀՀ կառավարությունը ՏՏ ոլորտի համար առաջնային
է համարում էլեկտրոնային կառավարման, տեղեկատվական հասարակության
(նաեւ` դպրոցների էլեկտրռնային փոխկապակցման, էլեկտրոնային կրթության)
զարգացումը, «Համակարգիչ` բոլորի համար» ծրագրի իրականացումը:
Վ.Դանիելյանը հավելեց, թե ՀՀ կառավարությունը գտնում է, որ
ապագայում Հայաստանի ՏՏ եւ բարձր տեխնոլոգիաների ոլորտները կարող
են դառնալ «մեծ լաբորատորիա գլոբալ շուկաների համար»:
Համաժողովի կազմակերպիչներն են ՀՀ Էկոնոմիկայի, Արտաքին
գործերի նախարարությունները եւ «Ձեռնարկությունների ինկուբատոր»
հիմնադրամը (ՁԻՀ): Վերջինիս տնօրեն Բագրատ Ենգիբարյանի խոսքերով,
ՏՏ ոլորտը ամբողջ աշխարհում լուրջ վնասներ է կրել համաշխարհային
տնտեսական ճգնաժամի հետեւանքով: Նա ՏՏ ոլորտում փորձի փոխանակումը
եւ համագործակցությունը կարեւորեց այն առումով, որ ՏՏ-ի նկատմամբ
նոր մոտեցումների կիրառումը այլ ոլորտներին կընձեռի ծախսերի
կրճատման միջոցով ճգնաժամի հետեւանքները մեղմելու հնարավորություն:
Ըստ Բ.Ենգիբարյանի, Հայաստանի ՏՏ ոլորտի ճիշտ շուկայական
թիրախներ ընտրած ընկերություններն ունեն նաեւ արտադրության եւ
աշխատատեղերի աճ: Նա կարեւորեց հայկական ՏՏ ձեռնարկությունների
հետագա մուտքը նոր շուկաներՆ նշելով, որ, ՀՀ վարչապետի
հանձնարարականով, պետական պատկան մարմինները` մասնավոր հատվածի հետ
համատեղ, մշակում են նշված ձեռնարկությունները նոր շուկաներում
վերադիրքավորելու մեխանիզմներ: Նրա գնահատմամբ, Հայաստանի ՏՏ
ոլորտի մրցակցային ամենամեծ առավելությունը մտավոր ներուժն է եւ
աշխատուժի հարաբերականորեն էժան գինը:
«Տարածաշրջանային համագործակցության խթանում տեղեկատվական
տեխնոլոգիաների միջոցով» համաժողովի (կավարտվի ապրիլի 3-ին)
աշխատանքերի շրջանակն ընդգրկում է «Ճգնաժամի ազդեցություն/ ՏՏ
աութսորսինգ/ Վաճառքի խթանում», «Երկրների ՏՏ քաղաքականություն/
Էլեկտրոնային հասարակություն» եւ «ՏՏ կրթություն/ աշխատուժի
զարգացում» բաժինները: