Բարաք Օբաման սկսում է իր առաջին Եվրոպական շրջագայությունը
31-03-2009 16:31:00 | ԱՄՆ | Միջազգային
ՎԱՇԻՆԳՏՈՆ, 31 ՄԱՐՏԻ, ՆՈՅՅԱՆ ՏԱՊԱՆ: ԱՄՆ-ի նախագահ Բարաք
Օբամայի եվրոպական առաջին ուղեւորությունն սկսվում է Մեծ
Բրիտանիայից, որտեղ նա կժամանի երեքշաբթի երեկոյան, լրագրողներին
հայտնել է Սպիտակ տան մամլո քարտուղար Ռոբերտ Գիբսը:
Չորեքշաբթի ծրագրված են ԱՄՆ-ի նախագահի երկկողմ հանդիպումները
Մեծ Բրիտանիայի, Ռուսաստանի, Չինաստանի ղեկավարների հետ:
Նույն օրը Օբաման հանդիպումներ կունենա Մեծ Բրիտանիայի
պահպանողական կուսակցության առաջնորդ Դեյվիդ Կամերոնի եւ Եղիսաբեթ
Երկրորդ թագուհու հետ: Հինգշաբթի ԱՄՆ-ի նախագահը կմասնակցի G-20-ի
գագաթնաժողովի աշխատանքին, իսկ հետո կմեկնի Ստրասբուրգ, որտեղ
կհանդիպի Ֆրանսիայի նախագահ Նիկոլա Սարկոզիի հետ: Այնտեղից ուրբաթ
օրը Օբաման ուղղաթիռով կուղեւորվի գերմանական Բադեն-Բադեն, որտեղ
նրան կդիմավորի ԳԴՀ կանցլեր Անգելա Մերկելը:
Սպասվում է, որ կիրակի ԱՄՆ-ի նախագահը կլինի Պրահայում, որտեղ
նա հանդիպում կանցկացնի Եվրոպական միության ղեկավարության հետ:
Օբաման նաեւ կհանդիպի Չեխիայի նախագահ Վացլավ Կլաուսի, նախկին
վարչապետ Միրեկ Տոպոլանեկի եւ հանրապետության նախկին նախագահ
Վացլավ Հավելի հետ:
Կիրակի օրը Օբաման կժամանի Թուրքիայի մայրաքաղաք Անկարա եւ
ելույթ կունենա թուրքական խորհրդարանում: