Գագիկ Մինասյան. «Ներկայումս պետական բյուջեի վերանայման որեւէ
հրամայական չկա»
12-03-2009 17:10:00 | Հայաստան | Տնտեսություն
ԵՐԵՎԱՆ, 12 ՄԱՐՏԻ, ՆՈՅՅԱՆ ՏԱՊԱՆ: Հայաստանի կառավարությունը
համաշխարհային ֆինանսատնտեսական ճգնաժամի եւ ազգային արժույթի`
դրամի, արժեզրկման հետեւանքները մեղմելու ուղղությամբ արդեն հանդես
է եկել որոշակի օրենսդրական փոփոխություններ կատարելու եւ
ենթաօրենսդրական ակտեր ընդունելու նախաձեռնությամբ: Վերջին օրերին
վարչապետը եւ կառավարության որոշ անդամներ նաեւ
խորհրդակցություններ են անցկացրել կոալիցիոն կուսակցությունների
խորհրդարանական խմբակցությունների հետ, իսկ մարտի 12-ին
նախատեսվում է վարչապետի հանդիպումը ընդդիմադիր «Ժառանգություն»
խմբակցության հետ, որոնց արդյունքում, հնարավոր է, նոր
նախաձեռնություններ ի հայտ գան: Այս մասին մարտի 12-ին «Հայացք»
ակումբում հայտնեց Ազգային Ժողովի Ֆինանսավարկային եւ բյուջետային
հարցերի մշտական հանձնաժողովի նախագահ, հանրապետական Գագիկ
Մինասյանը:
Նա հայտարարեց, որ ներկայումս պետական բյուջեի վերանայման
«որեւէ հրամայական չկա»: Ըստ Գ.Մինասյանի, բյուջետային համակարգի
մասին Հայաստանի օրենքը հնարավորություն է տալիս կառավարությանը
նախատեսված որոշ ծախսերի կատարումը տեղափոխել ավելի ուշ ժամկետի,
մասնավորապես, չորրորդ եռամսյակ: «Մենք ակնկալում ենք, որ
բավականին բարդ իրավիճակ պետք է լինի մեր բյուջեի հավաքագրման
առումով, սակայն երբեք չենք պատրաստվում մեր սոցիալական
ուղղվածության ծախսերը կրճատել»,- ասաց նա: Ինչ վերաբերում է
բյուջեի մուտքային մասին, ապա, ըստ Գ.Մինասյանի, առկա են բավականին
լուրջ ռեզերվներ, մասնավորապես, նախորդ տարիներին կուտակած եւ
չծախսած 77 մլրդ դրամի գումարը հնարավորություն կտա, ավելացնելով
դեֆիցիտը մինչեւ 3 տոկոս, ապահովել բյուջեի բոլոր ծախսային
հոդվածները:
Անդրադառնալով մարտի 3-ից դրամի եւ արտարժույթի ազատ
փոխարժեքի վերականգմանը, Գ.Մինասյանը նշեց, որ Կենտրոնական բանկը
այլեւս որեւէ ինտերվենցիա չի կատարում դրամի արժեքը պահելու համար,
միայն երբեմն փորձում է միջամտել` կտրուկ տատանումերը մեղմելու
նպատակով: Նրա խոսքերով, ներկայումս «դրամի փոխարժեքը դոլարի
նկատմամբ պահպանում է իր կայունությունը, իսկ ԿԲ-ի կողմից
իրականացվող միջամտությունները գումարային առումով զրոյականի են
հավասար»: Գ.Մինասյանի գնահատմամբ, դրամի 20 տոկոս արժեզրկման
հետեւանքով ապրանքային շուկայում առաջացած գների տատանումները
արդեն դադարել են, եւ գները կայունացել են: Նշվեց նաեւ, որ
այսուհետ դրամ/դոլար փոխարժեքի հնարավոր տատանումները
պայմանավորված կլինեն միջազգային շուկայում դոլարի տատանումներով: