ԱՄՀ. Ֆինանսական ճգնաժամը հասել է աշխարհի աղքատ երկրներ
05-03-2009 17:41:00 | ԱՄՆ | Միջազգային
ՎԱՇԻՆԳՏՈՆ, 5 ՄԱՐՏԻ, ՆՈՅՅԱՆ ՏԱՊԱՆ: Աշխարհի աղքատ երկրներն
արդեն սկսել են իրենց վրա զգալ համաշխարհային ֆինանսական ճգնաժամի
հետեւանքները, հայտարարել է ԱՄՀ ղեկավար Դոմինիկ Ստրոս-Կանը:
«Սկզբում իր մեջ առնելով զարգացած տնտեսությամբ երկրները, իսկ
հետո ձեւավորվող շուկայով երկրները` գլոբալ ֆինանսական ճգնաժամի
երրորդ մրրկահողմն այսօր կլանում է աշխարհի ամենաաղքատ եւ առավել
խոցելի երկրները»,- ասել է Ստրոս-Կանը` նշելով, որ տնտեսական
կացությունն այդ երկրներում վատթարանում է հիմնականում աղքատ
երկրներում արտադրվող ապրանքների պահանջարկի նվազման պատճառով:
ԱՄՀ-ի հրապարակած զեկույցում նշվում է, որ 22 ամենաաղքատ
երկրներին, որոնք առավել խոցելի են ծավալվող ճգնաժամի
պայմաններում, ընթացիկ տարում անհրաժեշտ է տրամադրել առնվազն 25
մլրդ դոլար արտոնյալ պայմաններով շտապ ֆինանսավորման ձեւով: