ԵՐԵՎԱՆ, 24 ՓԵՏՐՎԱՐԻ, ՆՈՅՅԱՆ ՏԱՊԱՆ: ՀՀ Կենտրոնական բանկը
«Կենդանակերպի նշաններ» միջազգային դրամագիտական ծրագրի շրջանակում
թողարկել է ցուլի պատկերով ոսկե հուշադրամ: Ծրագրում ներառված են
կենդանակերպի տասներկու նշանները:
Ըստ ՀՀ ԿԲ հասարակայնության հետ կապերի ծառայության,
հուշադրամի դիմերեսի կենտրոնում պատկերված է Հայաստանի
Հանրապետության զինանշանը, որից ներքեւ, շրջագծով, հայերեն եւ
անգլերեն անվանական արժեքի մակագրությունն է` «DRAM 10000 ԴՐԱՄ»:
Զինանշանից վերեւ նշված է թողարկման տարեթիվը` «2009»: Ամբողջը
եզերված է գծավոր շրջանագծով: Նշված շրջանագծի եւ եզրաշուրթի միջեւ
առկա է երկրորդ գծավոր շրջանագիծը: Շրջանագծերի միջեւ դաշտը
բաժանված է տասներկու հավասար մասերի, որոնցում պատկերված են
կենդանակերպի նշանների գրաֆիկական խորհրդանիշները: Եզրաշուրթի մոտ,
վերեւում` հայերեն, իսկ ներքեւում` անգլերեն, շրջանագծով մակագրված
է, համապատասխանաբար, «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» եւ «REPUBLIC OF
ARMENIA»:
Հուշադրամի դարձերեսի կենտրոնում աստղային երկնքի ֆոնի վրա
ցուլի պատկերն է: Վերեւի աջ ասում պատկերված է ցուլ կենդանակերպի
նշանի խորհրդանիշը: Ամբողջը եզերված է գծավոր շրջանագծով:
Շրջանագծի եւ եզրաշուրթի միջեւ, վերեւում` լատիներեն, իսկ
ներքեւում` ռուսերեն, նշված է համաստեղության անվանումը,
համապատասխանաբար, «TAURUS» եւ «ՏԵԼԵՑ»: Դարձերեսի դաշտի
ձեւավորման համար օգտագործվել են գունավոր ներկեր:
Հուշադրամը շրջանագծով, երկու կողմից ունի ուռուցիկ
եզրաշուրթ: Հուշադրամի ուրվագծերի հեղինակն է Ու. Վալեժակը:
Հուշադրամը դրվագվել է Լեհաստանի դրամահատարանում:
Հուշադրամի անվանական արժեքը 10 հազար դրամ է, մետաղը` ոսկի,
հարգը` 900, զանգվածը` 8,6 գ, տրամագիծը` 22 մմ, որակը` լավացված,
դրամաշուրթը` ատամնավոր, տպաքանակը` մինչեւ 10 հազար հատ: