Արցախում մահացել է ծանր հիվանդներից մեկը՝ 42-ամյա տղամարդ
19-12-2022 20:43:10 | Արցախ (ԼՂՀ) | Մամլո հաղորդագրություն
Ադրբեջանի գործողությունների հետևանքով շրջափակման մեջ հայտնված Արցախում բուժօգնության կարիք ունեցող ծանր վիճակում գտնվող հիվանդներից մեկն այսօր մահացել է։
Տեղեկությունը լրատվամիջոցներին է փոխանցել Ստեփանակերտի Հանրապետական բժշկական կենտրոնի գործադիր տնօրեն Մհեր Մուսայելյանը՝ նշելով, որ մահացածը 42-ամյա տղամարդ է, որը 15 տարի շարունակ հեմոդիալիզ էր ընդունում, և այս պահին նա տեղափոխման ենթակա չէր։
Ավելի վաղ ԱՀ առողջապահության նախարարությունը տեղեկացրել էր, որ «Հանրապետական բժշկական կենտրոն»-ում 11 բուժառու գտնվում է ռեանիմացիոն բաժանմունքում, որից 4-ը՝ ծայրահեղ ծանր վիճակում։ Բժիշկների կատարում են հնարավորը՝ հիվանդների վիճակը կայունացնելու համար:
«Արևիկ բուժմիավորումում» 10 երեխա գտնվում է ռեանիմացիոն բաժանմունքում: Երեխաներից մեկը գտնվում է ծայրահեղ ծանր վիճակում:
Կարմիր Խաչի միջազգային կոմիտեի միջնորդությամբ Արցախի Հանրապետության առողջապահության նախարարության «Հանրապետական բժշկական կենտրոն»-ից սրտային պաթոլոգիայով հիվանդը տեղափոխվել է ՀՀ մասնագիտացված բժշկական կենտրոն, նա հրատապ վիրահատության կարիք ունի:
Հիշեցնենք՝ արդեն 8-րդ օրն է՝ Ադրբեջանը շարունակում է փակ պահել ճանապարհը, շրջափակման մեջ է 120 հազար մարդ, 1100 քաղաքացի, որից 270-ը՝ անչափահաս, տուն վերադառնալ չի կարող։
ՀԱՅԵՐԵՆ
Русский
English
Դաս. հայերեն
French
