Երեւանի բռնցքամարտի միջազգային պատանեկան մրցաշարի հաղթող
ճանաչվեց Ռուսաստանի թիմը
18-02-2009 19:45:00 | Հայաստան | Սպորտ
ԵՐԵՎԱՆ, 18 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 18-ին Երեւանում
ավարտվեց բռնցքամարտի միջազգային պատանեկան թիմային մրցաշարը:
Վերջին փուլում ղազախները հաղթեցին վրացիներին` 21:16, ռուսները`
տանտերերին` 21:7: Արդյունքում, մրցաշարի հաղթող ճանաչվեց
Ռուսաստանի թիմը: Ղազախստանի, Հայաստանի եւ Վրաստանի թիմերը
գրավեցին, համապատասխանաբար, հաջորդ երեք տեղերը:
«Օրինաչափ եմ համարում Ռուսաստանի եւ Ղազախստանի
պատվիրակներից հետո մեր թիմի գրաված 3-րդ տեղը: Գոհ եմ տղաների
մրցելույթներից: Ստուգատեսը ցույց տվեց մեր պատանեկան բռնցքամարտի
իրական վիճակը»,- «ՆՏ»-ի թղթակցի հետ զրույցում ասասց Հայաստանի
հավաքականի ավագ մարզիչ, միջազգային կարգի մրցավար Ֆեդյա
Ալեքսանյանը:
Նա նշեց, որ հավաքականի վերջնական կազմը կորոշվի մարտի 1-ին
մեկնարկող Հայաստանի պատանեկան առաջնությունից հետո: Այնուհետեւ
կանցկացվեն ուսումնամարզական հավաքներ, որպեսզի թիմը հնարավորինս
լավ մարզավիճակում ներկայանա մայիսի 23-ին Երեւանում մեկնարկելիք
բռնցքամարտի աշխարհի պատանեկան առաջնությանը: