Չինաստանը Ուկրաինայում կարգավորման պայման է համարել Ռուսաստանի և ԱՄՆ-ի միջև բանակցությունները
18-02-2023 13:08:48 | Հայաստան | Ի՞նչ է գրում մամուլը
shantnews. Չինաստանի միջազգային հետազոտությունների ինստիտուտի եվրոպական բաժնի տնօրեն Կույ Հոնջյանն ասել է, որ ուկրաինական ճգնաժամի կարգավորումը պահանջում է ոչ միայն Մոսկվայի և Կիևի միջև երկխոսության վերականգնում, այլև բանակցություններ Ռուսաստանի և ԱՄՆ-ի, ինչպես նաև ՆԱՏՕ-ի այլ երկրների միջև, նրա խոսքերը մեջբերում է չինական Global Times թերթը։
«Միայն Ռուսաստանի Դաշնության և Ուկրաինայի միջև հակամարտության լուծումը չի կարող հիմնարար լուծում համարվել։ Եթե նույնիսկ երկու կողմերը կարողանան համաձայնության գալ հրադադարի շուրջ, ապագայում հակամարտությունը կարող է հանկարծակի նորից սրվել»,- ասել է Հոնջյանը:
Նրա խոսքով՝ Չինաստանը համոզված է, որ զինված հակամարտությունները չեն կարող ամբողջությամբ լուծվել միայն ուժի միջոցով։ Ռուսաստանը և Ուկրաինան պետք է ուղիղ երկխոսություն վարեն՝ առանց որևէ երրորդ կողմի միջամտության, ընդգծել է Հոնջյանը։
Բացի դրանից, Չինաստանը, մասնակցելով Գերմանիայում Մյունխենի անվտանգության համաժողովին, «կօգնի Եվրոպային մտածել աշխարհաքաղաքականության բարդության մասին, այլ ոչ թե պարզապես երկրները բաժանել սպիտակների և սևերի, ընկերների և թշնամիների»։
Ավելի վաղ ՄԱԿ-ում Չինաստանի մշտական ներկայացուցիչ Չժան Ջունը, ելույթ ունենալով կազմակերպության Անվտանգության խորհրդի նիստում, որը նվիրված էր Մինսկի համաձայնագրերի տարեդարձին, ասել էր, որ Չինաստանը Ռուսաստանին և Ուկրաինային կոչ է արել դադարեցնել կրակը և սկսել խաղաղ բանակցությունները որքան հնարավոր է շուտ։
Իր հերթին ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Չինաստանի կոչը՝ նստել բանակցությունների սեղանի շուրջ։ Նրա խոսքով՝ Ռուսաստանը չի մերժել խաղաղ երկխոսության առաջարկը։ Այնուամենայնիվ, ԱՄՆ-ի գլխավորած Կիևը օրենքով արգելել է Ռուսաստանի հետ բանակցությունները 2022 թվականի սեպտեմբերին։